من غير ما تروح الفرع.. طريقة إلغاء محفظتك الإلكترونية أونلاين

لو عندك محفظة إلكترونية على رقم موبايلك، وعاوز تلغيها أو تعرف كام محفظة متسجلة باسمك، دلوقتي تقدر تعمل ده من البيت ومن غير ما تروح أي فرع.

شبكة «ميزة» الرقمية أتاحت خدمة إلكترونية جديدة بتسمحلك تستعلم عن المحافظ المرتبطة برقم موبايلك، وكمان تقدم طلب لإلغاء تسجيلها مجانًا.

https://youtube.com/shorts/4EVZCIo4_bw?si=dXdiZwO2u7Nzheuq

الموضوع بسيط.. أول حاجة تدخل على الموقع الرسمي لشبكة ميزة من خلال اللينك الموجود في الوصف، وبعد كده تكتب رقم موبايلك والرقم القومي المكون من 14 رقم.

هتراجع شروط وأحكام الخدمة، وتوافق عليها، وبعدها تستكمل خطوات طلب الإلغاء حسب التعليمات اللي هتظهرلك على الشاشة.

بس خد بالك من كام شرط مهم: لازم بيانات ملكية الخط تكون مطابقة للرقم القومي، ومينفعش تتراجع عن طلب الإلغاء بعد تنفيذه، وكمان الخدمة متاحة مرة واحدة شهريًا لكل رقم.

والأهم أن الخدمة مجانية بالكامل، من غير أي رسوم أو زيارة للفروع.