بعد موجة تخارج مفاجئة.. الأموال الساخنة رحعت مصر وبقوة

يا ترى ليه الدولار رجع يتخطى مستوى 52 جنيه من جديد .. وهل الأموال الساخنة رجعت فعلا للسوق المصري .. وإزاي الأجانب والعرب اشتروا أدوات دين مصرية بأكتر من مليار دولار في أسبوع واحد؟

الأرقام الجديدة بتكشف إن تعاملات العرب والأجانب في السوق الثانوية للدين الحكومي المصري سجلت صافي شراء بحوالي 93 مليون دولار خلال تعاملات يوم الاثنين ..

والأهم إن التدفقات الإيجابية للأموال الساخنة استمرت رغم التوترات الجيوسياسية .. ووصل صافي مشتريات العرب والأجانب لأدوات الدين المصرية لحوالي 1.4 مليار دولار خلال الأسبوع الماضي ..

وده حصل بعد ما السوق شهد موجة تخارج في الأسبوع اللي قبله .. سجلت خلالها تعاملات العرب والأجانب صافي بيع بحوالي 513 مليون دولار ..

يعني إيه الكلام ده؟

ببساطة .. المستثمرين الأجانب والعرب رجعوا يضخوا سيولة في أدوات الدين المصرية بعد فترة قصيرة من التخارج .. وده معناه إن شهية الاستثمار في أدوات الدين رجعت تتحسن من جديد ..

لكن في نفس الوقت الدولار سجل ارتفاع خلال تعاملات الاثنين .. ورجع يتخطى مستوى 52 جنيه بعد التراجع اللي حصل في بداية تعاملات الأسبوع ..

وسجل أعلى سعر للدولار 52.05 جنيه للشراء و52.15 جنيه للبيع في عدد من البنوك .. بينما وصل السعر في البنك المركزي المصري لـ52.01 جنيه للشراء و52.15 جنيه للبيع ..

والصورة هنا بتقول إن السوق بيشهد تحركات متزامنة .. أموال ساخنة بتدخل أدوات الدين بقوة .. وفي المقابل الدولار بيتحرك فوق مستوى 52 جنيه ..

وده بيخلي اتجاه التدفقات الأجنبية وسلوك المستثمرين في أدوات الدين من أهم العوامل اللي تستحق المتابعة خلال الفترة الجاية.