ليلة سقوط الدهب.. هبوط قوي ومفاجيء لأسعار المعدن النفيس

يا ترى هل الدهب داخل على موجة هبوط جديدة في مصر؟ وهل الـ135 جنيه اللي خسرها عيار 21 مجرد تراجع مؤقت ولا بداية لموجة أكبر؟ والأهم.. هل وصل الدهب بالفعل للقاع ولا لسه فيه مستويات أقل؟

أسعار الذهب في مصر سجلت هبوط حاد.. وعيار 21 خسر حوالي 135 جنيه بنسبة تراجع وصلت لـ2.17% ليسجل 6100 جنيه للجرام..

أما عيار 24 فسجل حوالي 6971 جنيه.. وعيار 18 وصل لـ5228 جنيه.. بينما سجل الجنيه الذهب نحو 48 ألف و800 جنيه..

والسبب الأساسي مش محلي بس.. لأن الذهب بيتأثر بشكل مباشر بحركة الأسواق العالمية.. والأونصة تراجعت تحت ضغط ارتفاع عوائد السندات الأميركية وتغير توقعات المستثمرين بشأن أسعار الفائدة..

طب ليه عوائد السندات مهمة للذهب؟

لأن الذهب مش بيحقق عائد دوري.. وبالتالي لما عوائد السندات ترتفع بتبقى الأدوات المالية ذات الدخل الثابت أكثر جاذبية لبعض المستثمرين.. وده ممكن يدفع جزء منهم لتقليل حيازتهم من الذهب وإعادة توزيع استثماراتهم..

لكن الصورة مش مرتبطة بالسندات والدولار بس.. لأن تحركات النفط والتطورات الجيوسياسية المرتبطة بالأزمة الإيرانية كمان بتضغط على حركة المعدن النفيس..

وسعيد إمبابي المدير التنفيذي لمنصة آي صاغة أكد إن الهبوط الكبير في مصر بيعكس تأثر السوق المحلية بالتغيرات العالمية..

لكن التراجع الحالي مش معناه إن موجة الهبوط انتهت.. ومش دليل كمان إن الذهب وصل لأدنى سعر..

والفترة الجاية هتفضل مرتبطة باتجاه عوائد السندات الأميركية والدولار وأسعار الفائدة وحركة الأونصة عالميا.. بجانب الطلب الفعلي على الذهب في السوق المصرية..

وده معناه إن سعر الذهب لسه محتاج متابعة أكتر من مجرد النظر لخسارة يوم واحد.