470 مليار جنيه على النيل.. إيه حكاية الـ136 قطعة اللي الحكومة بتجهزها للمستثمرين؟
470 مليار جنيه على ضفاف النيل.. و136 قطعة أرض داخلة على خط الاستثمار.. الحكومة بتجهز لطرح مجموعة من الأراضي والمباني المطلة على كورنيش النيل في القاهرة والجيزة أمام المستثمرين، والترويج ليها من المقرر يبدأ خلال شهرين.
القصة بدأت بحصر واسع لأصول الدولة على ضفاف النيل، شمل 192 موقعًا بمساحة حوالي 745 فدانًا في القاهرة والجيزة. لكن المرحلة الحالية بتجهز حوالي 136 قطعة أرض مميزة لطرحها كفرص استثمارية.
والأهم إن التقييم المبدئي للأصول اللي دخلت مرحلة التقييم وصل لأكثر من 470.4 مليار جنيه، مع اختلاف قيمة كل قطعة حسب موقعها ونشاطها ونسب البناء والارتفاعات المسموح بيها.
وفي بعض المواقع، سعر المتر على كورنيش النيل يبدأ من حوالي 100 ألف جنيه ويوصل لـ500 ألف جنيه في المواقع الأكثر تميزًا.
والحكومة بتدرس استغلال الأراضي في مشروعات سياحية وفندقية وأنشطة استثمارية مختلفة، مع ترجيح الشراكة مع القطاع الخاص، مع عدم استبعاد البيع في بعض المواقع.
واللافت إن الاهتمام الاستثماري بدأ بالفعل، بعد ما صندوق التنمية الحضرية تلقى 3 طلبات من مستثمرين خليجيين للاستحواذ على أراضٍ ضمن الطرح المرتقب.
يعني ببساطة.. 136 قطعة على النيل بتتحول من أصول مملوكة للدولة إلى فرص استثمارية ضخمة، في واحدة من أهم المناطق العقارية في القاهرة الكبرى
