253 مليون دولار صادرات البطاطس المجمدة.. مصر تقفز للمركز الـ11 عالميا
مصر مش بس بتصدر بطاطس طازة.. لكن كمان دخلت بقوة في سوق البطاطس المجمدة والمصنعة، وده انعكس بشكل واضح على قيمة الصادرات.
خلال 2025، صادرات مصر من البطاطس المحضرة أو المحفوظة المجمدة وصلت لحوالي 253 مليون دولار، مقابل 213 مليون دولار في 2024، لتحتل مصر المركز الـ11 عالميًا في تصدير المنتج ده.
والقفزة دي مش وليدة سنة أو سنتين، لكن نتيجة نمو مستمر على مدار 10 سنين.. فالصادرات ارتفعت من 50 مليون دولار في 2015 لـ253 مليون دولار في 2025، بينما زادت الكميات من 48 ألف طن لـ238 ألف طن تقريبًا.
والبطاطس المصرية بتوصل لأسواق مهمة، أبرزها الأردن والسعودية والبرازيل والإمارات والولايات المتحدة. والأهم أن الفرصة لسه كبيرة، لأن فيه فرص تصديرية غير مستغلة بأكتر من 80 مليون دولار، في سوق عالمي وارداته بتقرب من 14.2 مليار دولار. يعني التصنيع الغذائي بيفتح باب جديد لزيادة صادرات مصر وتعظيم القيمة المضافة للمنتج المصري.
