فخ الأموال الساخنة يعود من جديد.. مخاوف من سيناريو 2022
الأموال الساخنة رجعت تاني للسوق المصري.. لكن المرة دي وسط حركة شديدة التقلب وده بيطرح سؤال مهم.. هل التدفقات دي بداية استقرار حقيقي؟ ولا ممكن نشوف سيناريو خروج مفاجئ زي اللي حصل قبل كده؟
خلال أيام قليلة.. المستثمرين الأجانب والعرب انتقلوا من البيع للشراء وبالعكس.. والدولار نفسه بدأ يفقد مستوى الـ52 جنيه اللي وصله الأسبوع اللي فات
وعشان نفهم الصورة فيه 3 أسئلة أساسية لازم نجاوب عليها وأول سؤال هو .. هل الأموال الساخنة رجعت فعلًا للسوق المصري؟
الإجابة آه، وده واضح من اخر التعاملات .. بيانات البورصة المصرية أظهرت إن تعاملات العرب والأجانب في السوق الثانوية للدين الحكومي سجلت صافي شراء بحوالي 775.4 مليون دولار.. وده تحول مهم بعد أسبوع واحد بس من تسجيل صافي بيع بقيمة 513 مليون دولار.. يعني إحنا قدام سوق بيتحرك بسرعة والتدفقات داخلة وخارجة في فترة زمنية قصيرة.
طب ليه الأموال الساخنة بقت متقلبة بالشكل ده؟
السبب الأساسي حسب البيانات المطروحة هو عودة التوترات الجيوسياسية في المنطقة اللي زودت حالة الحذر عند المستثمرين.
والأرقام بتوضح حجم التقلبات.. يوم الخميس الماضي سجلت التعاملات صافي بيع بـ267.5 مليون دولار، بعد خروج 290 مليون دولار يوم الأربعاء.
لكن في المقابل يوم التلات كان مختلف تمامًا، وسجلت الأموال الساخنة صافي شراء بـ463 مليون دولار، بعد مبيعات قوية وصلت لـ418 مليون دولار يوم الاثنين.. يعني في أيام قليلة، السوق شاف دخول وخروج بمئات الملايين من الدولارات.
وهل التقلبات دي ممكن تضغط على الدولار وتعيد سيناريو الخروج المفاجئ؟
المؤكد إن الأموال الساخنة بتأثر بشكل مباشر على حركة السيولة الأجنبية في السوق، وبالتالي أي تغير كبير في اتجاهها بيبقى محل متابعة.
لكن في الوقت الحالي الصورة فيها جانب إيجابي واضح وهو إن الدولار تراجع مجددًا خلال تعاملات الأربعاء، واستكمل الهبوط اللي بدأه يوم الثلاثاء.
والأهم إن الدولار فقد مستوى الـ52 جنيه بعد ما كان وصل للمستوى ده الأسبوع الماضي لأول مرة منذ 3 شهور.. لكن المشكلة إن استمرار التدفقات مش مضمون، خصوصًا مع حالة التقلب الحالية
