البطاطس المجمدة تفتح لمصر باب الـ250 مليون دولار.. إيه الحكاية؟
البطاطس المجمدة فتحت لمصر باب بـ 253 مليون دولار في سنة واحدة.. والحكاية أكبر من مجرد بطاطس نصف مقلية.
مصر وصلت للمركز الـ11 عالميًا في صادرات البطاطس المحضرة أو المحفوظة المجمدة خلال 2025، بصادرات بلغت حوالي 253 مليون دولار، مقابل 213 مليون دولار في 2024.
والقفزة دي جزء من نمو كبير حصل خلال 10 سنين..
صادرات مصر من البطاطس المجمدة ارتفعت من حوالي 50 مليون دولار في 2015 إلى 253 مليون دولار في 2025، بينما زادت الكميات المصدرة من 48 ألف طن إلى حوالي 238 ألف طن.
طيب مين بيشتري البطاطس المصرية؟
الأردن جت في المركز الأول بقيمة حوالي 51 مليون دولار، وبعدها السعودية بـ45 مليون دولار، ثم البرازيل بـ36 مليون دولار، والإمارات بـ32 مليون دولار، والولايات المتحدة بحوالي 27 مليون دولار.
والأغرب إن السوق العالمي نفسه ضخم جدًا.. واردات العالم من البطاطس المحضرة أو المحفوظة المجمدة وصلت لحوالي 14.2 مليار دولار في 2025، وأكبر مستورد كانت الولايات المتحدة بـ2.1 مليار دولار، وبعدها بريطانيا وفرنسا واليابان وألمانيا.
أما مصر، فمش بتعتمد على تصدير البطاطس الطازة بس.. هي بتحول المحصول لمنتجات مصنعة ذات قيمة مضافة، زي البطاطس نصف المقلية والـFrench Fries والـWedges والـHash Browns وغيرها.
والقطاع نفسه بيكبر..
إجمالي صادرات مصر من مصنعات البطاطس وصل لـ330 مليون دولار في 2025، والبطاطس المجمدة استحوذت لوحدها على حوالي 77% من الرقم ده.
والفرصة لسه أكبر، لأن المجلس التصديري للصناعات الغذائية بيقدر الفرص التصديرية غير المستغلة لمصر في أسواق مختلفة بحوالي 80 مليون دولار.
يعني البطاطس اللي بنشوفها في طبق جنب البرجر أو الفراخ.. بقت واحدة من المنتجات اللي بتدخل لمصر مئات الملايين من الدولارات من التصدير.
