140 مليار جنيه ديون.. إيه حكاية السداد "كاش" والصكوك؟
140 مليار جنيه.. رقم ضخم في ملف مديونيات مصر، لكن السؤال الأهم: الفلوس دي هتتسدد إزاي؟
الدولة بتبحث خطة لتسوية مديونية متراكمة من سنة 2014، بين وزارة المالية والهيئة العامة للسلع التموينية والبنوك المحلية.
والمديونية دي مرتبطة بتسهيلات ائتمانية حصلت عليها هيئة السلع التموينية من البنوك، بضمان وزارة المالية.
طيب.. إيه حكاية السداد "كاش" والصكوك؟
الخطة المطروحة بتقول إن جزء من الـ140 مليار جنيه هيتسدد نقدًا، بينما الجزء التاني هيتم سداده عن طريق طرح صكوك بشكل سنوي لمدة 10 سنين.
والطرح الأول للصكوك من المقرر يبدأ في 2027.
والمديونية دي تراكمت على مدار سنين بسبب عوامل مختلفة، منها فروق أسعار السلع التموينية، وتغيرات سعر الصرف، وارتفاع تكلفة السلع المستوردة، بالإضافة لزيادة الأسعار العالمية وتكاليف الشحن.
وكمان الاضطرابات الجيوسياسية ساهمت في زيادة الضغوط والتكاليف.
وحاليًا فيه لجنة مشتركة بتضم وزارة المالية والبنوك والجهات المعنية، عشان تحدد الحسابات النهائية وتتفق على سعر عادل لفوائد البنوك.
يعني باختصار.. الـ140 مليار جنيه مش هيتسددوا دفعة واحدة، لكن الخطة المطروحة تجمع بين السداد النقدي والصكوك، مع امتداد سداد الجزء الخاص بالصكوك على 10 سنين بداية من 2027.
