أسطول صيد هيقلب المعادلة.. مصر هتسيطر على المحيطات والبداية بـ 3 سفن عملاقة
يا ترى هل مصر فعلًا بتجهز لأسطول صيد يخرج لأعالي البحار؟ وهل 3 سفن بس ممكن يكونوا بداية تغيير كبير في خريطة الصيد المصري؟ وليه مصر مهتمة أصلا بملف سفن الصيد بالشكل ده؟
مصر بدأت بالفعل أول خطوة في مشروع أسطول حديث لسفن الصيد القادرة على العمل في المياه الدولية بعيد عن السواحل المصرية.
البداية كانت مع رزق 1 اللي انضمت لهيئة قناة السويس خلال 2025 كأول سفينة صيد مصرية حديثة مخصصة للصيد في أعالي البحار.
وفي مايو 2026 اتدشنت رزق 2 ورزق 3 في ترسانة جنوب البحر الأحمر بسفاجا ليصل عدد سفن عائلة رزق اللي تم بناؤها وتدشينها إلى 3 سفن.. لكن هل السفن دي دخلت الخدمة فورًا؟
لأ لسه.. رزق 2 ورزق 3 كان مقرر يخضعوا لتجارب بحرية لمدة شهرين تقريبًا قبل الدخول للخدمة.
والأهم إن الـ 3 سفن دول مجرد بداية لأن الخطة الأكبر بتستهدف إنشاء أسطول مكون من 12 سفينة صيد أعالي بحار.
الأسطول هيضم 6 سفن Long Liner للصيد بالخيوط الطويلة و6 سفن Fish Trawler للصيد بالجر.
وده معناه إن مصر بتبني قدرة جديدة للوصول لمناطق صيد بعيدة والتعامل مع مصايد مختلفة بدل الاعتماد بشكل أساسي على المصايد القريبة من السواحل.
والهدف مش مجرد زيادة عدد السفن.. الفكرة إن يبقى عند مصر أسطول وطني قادر يشتغل في أعالي البحار والمياه الدولية ويفتح الباب للوصول لمناطق صيد بعيدة ومصايد التونة في دول مختلفة.
يعني الـ 3 سفن مش نهاية القصة.. دي بداية أسطول مصري من 12 سفينة.
