“الغمة بتنزاح ومحدش هيتحكم فينا”.. مصر تتخلص من كابوس الديون

خلاص الغمة بتنزاح ومصر باذن الله في طريقها للتخلص من كابوس ديون صندوق النقد الدولي .. وفي الأيام الأخيرة فيه خبر مهم عدا ومحدش خد باله منه.

مصر حصلت على تمويلات من صندوق النقد بإجمالي 25.3 مليار دولار على مدار حوالي 10 سنين ودخلت في 3 برامج مع الصندوق من نوفمبر 2016 وحتى دلوقتي.

والأهم إن مصر سددت بالفعل حوالي 16 مليار دولار من أصل الدين وسددت كمان كل الفوائد المستحقة في مواعيدها.

يعني المتبقي حاليًا من أصل المبالغ اللي حصلت عليها مصر من الصندوق حوالي 9.3 مليار دولار.

طيب هل ده معناه إن كابوس الديون انتهى؟

الحقيقة إن الرقم لسه كبير شوية لكن الاتجاه نفسه مهم لأن انتظام السداد مع الالتزام بالجداول الزمنية بيساعد على خفض المديونية تدريجيًا.

والهدف المعلن هو تخفيف أعباء الديون تدريجيًا لحد الوصول إلى تصفير المديونية بحلول 2047.

وده معناه إن المعركة مخلصتش ولسه فيه التزامات لكن الرسالة الأهم إن مصر بتتحرك في اتجاه تقليل المديونية بدل زيادتها.