لو موظف حكومي.. فرصة شقة بالإيجار من الإسكان متفوتهاش

لو أنت موظف حكومي وبتدور على شقة.. الفرصة دي ممكن تهمك.. وزارة الإسكان تستعد لطرح جديد بحوالي 20 ألف وحدة سكنية، من بينها 15 ألف شقة بنظام الإيجار والإيجار المنتهي بالتمليك.

والميزة إن النظام ده مخصص كمان لموظفي الدولة، ومن غير سداد مقدم إيجار.

مدة الإيجار بتوصل لـ3 سنين، وقابلة للتجديد لمدة مماثلة، وكمان ممكن تتقدم بطلب لتحويل الوحدة إلى تمليك، وفقًا للضوابط والشروط.

طيب إيه أهم الشروط؟

لازم سن المتقدم مايزدش على 35 سنة، والقيمة الإيجارية ما تتعداش 25% من دخله الشهري.

لكن فيه تأمين بيتسدد، وقيمته بتكون إيجار شهرين أو 3 شهور حسب الضوابط.

ولو أنت موظف حكومي، هتحتاج مفردات مرتب حديثة ومعتمدة من جهة العمل، ويكون موضح فيها الحوافز والبدلات، بالإضافة لبطاقة الرقم القومي وأوراق الحالة الاجتماعية والأبناء وإيصال مرافق حديث.

والطرح هيكون في عدد من المدن الجديدة بالقاهرة والمحافظات، ومن المقرر الإعلان عن تفاصيله خلال الأسابيع المقبلة.

يعني لو سنك مناسب وبتشتغل في الحكومة.. تابع الطرح، لأنك ممكن تلاقي شقتك بنظام إيجار، ومع إمكانية التحويل للتمليك وفق الشروط.