هتجدد رخصة عربيتك في 60 ثانية.. مفاجأة جديدة من الداخلية
تعرف انك ممكن تخلص تجديد رخصة عربيتك في دقيقة واحدة بس...من غير ما تقف بالساعات في المرور.
وزارة الداخلية بدأت تشغيل ماكينة ذكية لتجديد رخص تسيير السيارات، والماكينة موجودة حاليًا في مول سيتي ستارز بمدينة نصر، وتحديدًا في المرحلة التانية بالدور الأرضي.
والحكاية مش تجديد رخصة وبس.. الماكينة تقدر من خلالها تطلع بدل فاقد، وبدل تالف، وكمان تطبع الرخصة وتستلمها في نفس اللحظة.
يعني بدل ما تروح المرور وتدخل في إجراءات وانتظار، الخدمة بتتعمل إلكترونيًا وبشكل فوري.
والهدف واضح... تقليل الزحمة في وحدات المرور، وتوفير وقت ومجهود أصحاب العربيات، ضمن خطة التحول الرقمي في الخدمات المرورية.
لكن قبل ما تروح للماكينة، فيه كام شرط لازم يكونوا متحققين.
أول حاجة، تكون سددت كل المخالفات المسجلة على العربية.
ولو العربية محتاجة فحص فني، لازم يكون اتعمل في وحدة المرور المختصة.
وكمان ما يكونش فيه حظر بيع على العربية، وبيانات العربية وصاحبها تكون متطابقة على النظام الإلكتروني.
يعني لو كل الشروط متوفرة... ممكن الرخصة تخلص معاك في حوالي 60 ثانية.
