تحركات عاجلة في بنوك مصر.. إيه اللي بيحصل في الكواليس؟

هو ليه البنوك كلها فجأة بقت ترفع العائد على حسابات التوفير؟ وفلوسك في حساب التوفير ممكن تجيب كام دلوقتي؟ وليه البنوك داخلة سباق جديد على فلوس المودعين؟ وإيه سر قفزة 412.7 مليار جنيه في حسابات التوفير خلال 5 شهور؟

النهارده البنوك في مصر داخلة سباق جديد على جذب فلوس العملاء لكن المرة دي المنافسة مش على شهادات الادخار بس لكن كمان على حسابات التوفير اللي بقت بتحقق عوائد أعلى من أي وقت فات.

والسؤال دلوقتي إيه اللي حصل وخلى البنوك تغير استراتيجيتها وترفع العائد بالشكل ده؟ وإيه اللي يخلي حساب التوفير يبقى هو نجم المرحلة الحالية؟

السبب الرئيسي إن البنوك بقت محتاجة سيولة أكتر عشان تقدر تمول الطلب المتزايد على القروض وفي نفس الوقت تحافظ على قاعدة المودعين وبدل ما تعتمد على وعاء ادخاري واحد بدأت تقدم منتجات متنوعة تناسب كل عميل وده خلى حسابات التوفير ترجع بقوة لأنها بتجمع بين ميزة مهمة جدا وهي إنك تقدر تسحب وتحط فلوسك في أي وقت من غير ما تكون مربوط بمدة معينة وفي نفس الوقت تاخد عائد محترم على فلوسك.

وده واضح جدا في أرقام البنك المركزي اللي كشفت إن أرصدة حسابات التوفير والودائع تحت الطلب زادت خلال أول 5 شهور من السنة بحوالي 412.7 مليار جنيه ووصلت إلى 2.7 تريليون جنيه بنهاية مايو بينما كانت الزيادة في نفس الفترة من السنة اللي فاتت حوالي 248 مليار جنيه وده معناه إن الإقبال على النوع ده من الحسابات زاد بشكل كبير.

طيب البنوك عملت إيه عشان تكسب العملاء؟

خلال الفترة الأخيرة معظم البنوك أعادت تسعير حسابات التوفير ورفعت العائد وقدمت برامج جديدة بعوائد متدرجة كل ما رصيد العميل يزيد كل ما العائد يزيد كمان مع توفير خدمات رقمية أسهل وإمكانية اختيار طريقة صرف العائد سواء شهري أو ربع سنوي أو غيرها حسب احتياج كل عميل.

ولو بصينا على أعلى العوائد هنلاقي إن بنك الإمارات دبي الوطني مصر طرح حساب التوفير المميز لعملاء Priority Banking بعائد يوصل إلى 18.25 بالمئة شهريا بحد أدنى مليون جنيه.

ونفس العائد تقريبا بيقدمه مصرف أبوظبي الإسلامي من خلال حساب الغنى بلس بعائد يصل إلى 18.25 بالمئة حسب حجم الرصيد مع حد أدنى 250 ألف جنيه.

وبنك المشرق مصر بيقدم حساب توفير بعائد يصل إلى 18 بالمئة للأرصدة اللي تبدأ من 50 ألف جنيه.

أما بنك نكست فبيقدم حساب بلس بعائد شهري يصل إلى 18 بالمئة وبحد أدنى 5000 جنيه وده يعتبر من أقل الحدود الدنيا بين البنوك اللي بتقدم عوائد مرتفعة.

وبنك القاهرة بيقدم حساب ميجا توفير بعائد يصل إلى 17.75 بالمئة حسب حجم الرصيد.

وبنك مصر بيقدم حساب كاش توفير بعائد يومي أو شهري يصل إلى 17.70 بالمئة للأرصدة اللي تبدأ من 100 ألف جنيه.

وكمان بنك الإسكندرية والبنك المصري الخليجي والتجاري وفا بنك والبنك الأهلي المصري والبنك العربي الأفريقي الدولي رفعوا العوائد على حسابات التوفير لتوصل في بعض الشرائح إلى حوالي 17 بالمئة و17.50 بالمئة مع تنوع كبير في دوريات صرف العائد.

طيب ليه العملاء بقوا يفضلوا حسابات التوفير؟

السبب بسيط لأن السوق شهد خلال الفترة الأخيرة تغييرات متكررة في أسعار الفائدة وده خلى ناس كتير تفضل تحتفظ بمرونة في إدارة فلوسها بدل ما تربطها في شهادة لفترة طويلة وحساب التوفير وفر المعادلة دي لأنه بيدي عائد وفي نفس الوقت بيسمح بالإيداع والسحب وقت ما العميل يحتاج.

ومن ناحية البنوك كمان حسابات التوفير بقت وسيلة مهمة لجذب سيولة مستقرة خصوصا لما تكون العوائد المرتفعة مرتبطة بالأرصدة الكبيرة لأن ده بيساعد البنوك تعتمد على الفلوس دي في تلبية احتياجاتها التمويلية قصيرة الأجل ويقوي مركزها المالي.

وده يفسر ليه البنوك خلال آخر سناين رفعت متوسط العائد على حسابات التوفير أكتر من مرة لأن المنافسة على جذب السيولة بقت أقوى من أي وقت فات وكل بنك بيحاول يقدم ميزة إضافية تجذب عملاء جدد وتحافظ على العملاء الحاليين.

لكن هل ده معناه إن كل الناس لازم تنقل فلوسها لحسابات التوفير؟

الإجابة بتعتمد على احتياج كل شخص لو أنت محتاج تسيب فلوسك متاحة للسحب في أي وقت فحساب التوفير هيكون مناسب ولو مش محتاج السيولة لفترة طويلة ممكن تفضل بعض المنتجات الادخارية التانية تحقق عائد مختلف حسب ظروف السوق.