وفر فلوسك.. 5 طرق بسيطة تقلل فاتورة الكهرباء في الحر
بتسيب السخان الكهربا شغال طول اليوم؟، وفاكر إن السخان بيستهلك كهربا بس وقت الاستخدام؟، وعارف إن جهاز واحد في بيتك ممكن يكون السبب في فاتورة الكهرباء العالية؟، وليه فاتورة الكهرباء بتزيد في الصيف رغم إنك مش بتستخدم السخان؟، وإيه السر اللي بيخلي السخان يسحب كهربا حتى وإنت مش فاتحه؟، وإزاي توفر مئات الجنيهات في السنة من غير ما تشتري أي جهاز جديد؟
في عز الحر، أغلب الناس بتفتكر إن أكتر جهاز بيستهلك كهربا في البيت هو التكييف، لكن الحقيقة إن فيه جهاز تاني ممكن يكون بيرفع فاتورتك كل شهر وإنت مش حاسس.
الحقيقة هو السخان، لأن ناس كتير بيسيبوا السخان موصل بالكهربا 24 ساعة، سواء في الصيف أو الشتاء، على أساس إنه مش هيستهلك غير وقت استخدام المياه الساخنة... لكن الحقيقة مختلفة تمامًا.
جهاز تنظيم مرفق الكهرباء وحماية المستهلك حذر من العادة دي، وأكد أن السخان لما يكون موصل بالكهربا، مش بيقف عن الشغل بعد ما تخلص استخدامه.
طيب بيعمل إيه؟، السخان فيه ترموستات، وكل ما حرارة المياه داخل الخزان تنخفض، السخان يشتغل أوتوماتيك علشان يرجع يسخنها تاني، حتى لو محدش استخدم نقطة مياه ساخنة من الأساس.
السخان ممكن يفضل يستهلك كهربا طول اليوم، وإنت فاكر إنه واقف، وده بيكون أوضح في الصيف، لأن أغلب الناس أصلًا مش بتستخدم المياه الساخنة بشكل مستمر، ومع ذلك بيسيبوا السخان شغال بدون أي داعي.
طيب إيه النتيجة؟.. النتيجة إن استهلاك الكهرباء بيزيد، وقيمة الفاتورة الشهرية بتعلى، ولو عندك عداد مسبق الدفع هتلاقي الرصيد بيخلص بسرعة، خصوصًا مع تشغيل التكييفات والمراوح وباقي الأجهزة اللي بتشتغل بقوة في الصيف.
علشان كده، جهاز تنظيم الكهرباء قدم شوية نصائح بسيطة، لكنها ممكن تفرق معاك بشكل كبير في الاستهلاك.
أول حاجة، افصل السخان من الكهرباء لما تكون مش محتاجه.
تاني حاجة، شغله قبل الاستخدام بحوالي نصف ساعة، وبعدها افصله تاني، بدل ما يفضل شغال طول اليوم.
كمان حاول تضبط الثرموستات على درجة حرارة بين 50 و60 درجة مئوية، لأن رفع الحرارة لأعلى من كده بيخلي السخان يشتغل لفترة أطول ويستهلك كهربا أكتر.
ومن الحاجات المهمة جدًا، اعمل صيانة دورية للسخان، ونضف الرواسب الجيرية اللي بتتجمع جوه الخزان كل 3 إلى 6 شهور، لأن الرواسب دي بتقلل كفاءة التسخين وبتخلي الجهاز يستهلك كهربا أكتر.
ولو لسه بتجهز بيت جديد، حاول يكون السخان قريب من مكان استخدام المياه الساخنة، لأن طول المواسير بيخلي الحرارة تضيع، وبالتالي السخان يشتغل مرات أكتر.
من الآخر، ممكن تكون بتدفع كل شهر مبلغ زيادة بسبب عادة بسيطة جدًا، وهي إنك سايب السخان موصل بالكهربا على طول.
ولو غيرت العادة دي، والتزمت بالنصائح اللي أعلنها جهاز تنظيم الكهرباء، هتوفر جزء محترم من استهلاك الكهرباء، وتحافظ على عمر السخان، وكمان تقلل قيمة فاتورتك الشهرية من غير ما تحرم نفسك من أي راحة.
