نسيت تشحن عداد الكهرباء وانت مسافر؟ اعمل كده فورًا قبل ما النور يفصل

لو سافرت وافتكرت فجأة إنك نسيت تشحن كارت عداد الكهرباء، متقلقش، فيه كذا حل سريع ممكن ينقذك من موقف مفاجئ زي ده.

أول حل هو "رصيد الطوارئ" الموجود في بعض العدادات مسبقة الدفع، وده بيخلي النور يفضل شغال بشكل مؤقت لحد ما تقدر تشحن، وممكن يساعدك يوم أو يومين حسب نوع العداد.

تاني حل إن حد من الجيران أو الحارس يروح للعداد، ويضغط على الزر الرئيسي ضغطه مطولة من 10 لـ15 ثانية.. وفي عدادات كتير الطريقة دي بتفعل وضع الطوارئ.

كمان تقدر تشحن العداد عن بُعد باستخدام رقم العداد بس، من خلال تطبيقات الدفع الإلكتروني أو منافذ الشحن، حتى لو مش معاك الكارت نفسه.

ولو العداد ذكي، ممكن تلاقي الشحن بيتم تلقائي من غير ما تحتاج تدخل الكارت أصلاً.

ولو كل ده ما نفعش، الحل الأخير إن حد يروح شركة الكهرباء ويطلع كارت بدل فاقد باسم صاحب الشقة، وبعدها يتم شحنه وإرجاع الكهرباء فورًا.

المهم إن الموضوع ليه أكتر من حل ومش لازم الرجوع من السفر عشان مشكلة زي دي تقطع عليك يومك.