هتنزل بعد 15 يوم.. ايه اللي هيحصل في أسعار الطماطم؟
الطماطم وصلت لـ 70 جنيه بس استنى في خبر ممكن يطمنك شوية.. الارتفاع الكبير اللي حصل في أسعار الطماطم الفترة الأخيرة مش هيكمل، وده كلام مسؤولين في شعبة الخضروات، اللي أكدوا إن الأزمة دي مؤقتة بسبب تغيير المواسم الزراعية وقلة المعروض مع التقلبات الجوية اللي حصلت مؤخرًا
الفكرة ببساطة إن موسم قديم خلص ولسه الجديد ما دخلش بقوة، فحصل نقص في الكميات وده اللي خلّى الأسعار تطلع بالشكل الجنوني ده، لكن مع بداية الموسم الجديد خلال 10 لـ 15 يوم، الكميات هتزيد في السوق وده هيخلي الأسعار تبدأ تنزل تدريجيًا.
كمان في تحرك من الدولة لضبط السوق، من خلال ضخ كميات كبيرة في المجمعات الاستهلاكية بأسعار أقل علشان تعمل توازن، وفعلاً الطماطم متوفرة هناك بأسعار أقل من السوق بفرق واضح.
ومن ضمن الأسباب كمان إن في فلاحين كانوا قللوا زراعة الطماطم السنة اللي فاتت بسبب إن سعرها كان قليل وقتها، وده أثر على الإنتاج دلوقتي.. يعني اللي بيحصل ده مش أزمة دائمة، دي فترة انتقالية وهتعدي، وخلال أسبوعين تقريبًا ممكن نبدأ نشوف الأسعار بترجع لطبيعتها تاني.
