بعد قرار العمل من البيت.. إزاي تحافظ على باقة الإنترنت وتستغلها صح؟

مع زيادة الاعتماد على العمل من المنزل يوم واحد أسبوعيًا ضمن خطة الحكومة لترشيد الطاقة، بقى استخدام الإنترنت في البيت أكتر من الأول، وده خلى ناس كتير تبدأ تقلق على باقات النت بسرعة ما تخلص قبل نهاية الشهر.

عشان كده مهم نفهم إزاي نقدر نحافظ على الباقة ونستخدم الإنترنت بشكل أذكى من غير ما نستهلكها بسرعة. أول حاجة لازم نركز عليها هي جودة المشاهدة، يعني بدل ما تشغل الفيديوهات بأعلى جودة، تقدر تقللها لـ 720 أو حتى أقل، وده بيوفر استهلاك كبير جدًا من البيانات.

كمان لازم ناخد بالنا من عدد الأجهزة المتصلة بالراوتر، لأن أي جهاز زيادة بيستهلك من الباقة من غير ما تحس، وده بيكون أحيانًا بسبب سرقة الواي فاي لو الباسورد ضعيف أو متسرب.

ومن النصائح المهمة كمان تغيير كلمة السر بشكل دوري، وفصل الراوتر وقت ما تكون مش في البيت، علشان تمنع أي استخدام غير ضروري. وفي نفس الوقت، لو شغلك بقى أكتر من البيت وبتحتاج سرعة أعلى، ممكن تفكر في ترقية الباقة بدل ما تفضل تضغط على نفس السعة وتخلص بسرعة.

الشركة المصرية للاتصالات بتقدم باقات مختلفة، بتبدأ من حوالي 140 جيجابايت بسرعة مناسبة وسعر بسيط، وبتوصل لحد باقات أكبر زي 600 جيجابايت و1 تيرابايت للي استخدامه عالي. وكمان في سعات إضافية تقدر تشحنها وقت ما تخلص الباقة، زي 20 أو 50 أو حتى 100 جيجابايت، علشان تكمل الشهر من غير ما تقطع شغلك.