شق الثعبان بيتغير.. استثمارات ضخمة وطموح كبير من الدولة
تخيل كده أن في مكان في مصر بيتقال عليه واحدة من أهم قلاع الرخام والجرانيت في العالم، مكان بيصدر منتجاته لدول كتير جدًا، وبيشتغل فيه آلاف العمال يوميًا، المكان ده هو منطقة شق الثعبان جنوب القاهرة.
الحكومة دلوقتي قررت تدي المنطقة دي دفعة قوية جدًا، بعد ما أعلنت عن خطة تطوير ضخمة باستثمارات توصل لحوالي مليار و400 مليون جنيه، والهدف من الخطة دي بسيط وواضح، وهو تحسين البنية التحتية وتطوير المرافق، وخلق بيئة شغل تليق بحجم المنطقة اللي تعتبر من أكبر مراكز تصنيع الرخام في العالم.
المنطقة نفسها مش صغيرة خالص، إحنا بنتكلم عن مساحة حوالي 1600 فدان تقريبًا، وفيها أكتر من 1800 مصنع وورشة شغالين في الرخام والجرانيت، وعلشان كده الدولة شايفة أن تطوير المكان ده ممكن يفتح أبواب كبيرة للاستثمار والتصدير.
كمان خطة التطوير مش مجرد تجميل أو رصف طرق وخلاص، لكن هي خطة شاملة هدفها إن شق الثعبان تتحول لمدينة عالمية للرخام والجرانيت.
يعني إيه الكلام ده؟، يعني خدمات أفضل للمستثمرين، حل المشاكل القديمة اللي كانت بتعطل الشغل، توصيل مرافق بشكل كامل لكل المصانع، وكمان تقنين أوضاع المصانع والورش اللي شغالة هناك.
ومن ناحية تانية، الدولة كمان بتفكر في المستقبل، علشان كده في خطة لإنشاء مركز خدمات متكامل جوه المنطقة، يخلي المستثمر يقدر يخلص كل إجراءاته بسهولة بدل ما يلف على كذا جهة.. وكمان هيتم إنشاء مدرسة تدريب مهني متخصصة في الرخام والجرانيت، علشان تخرج عمالة فنية مدربة تقدر تشتغل في المصانع وتدعم الصناعة دي اللي بقت واحدة من الصناعات المهمة في مصر.
والخطوة دي بتيجي ضمن رؤية وزارة الصناعة اللي أكد عليها خالد هاشم، واللي شدد إن الدولة مهتمة جدًا بزيادة صادرات المنطقة ورفع قدرتها التنافسية في الأسواق العالمية.
لكن في نقطة مهمة كمان، الدولة أعلنت أنها هتدي مهلة للمستثمرين اللي لسه ما قننش أوضاعهم، علشان يدخلوا المنظومة الرسمية، وكمان قدمت تسهيلات كبيرة جدًا، زي خصم 25% من قيمة التقنين لو المستثمر سدد المبلغ بالكامل، مع إعفاء كامل من الغرامات.
والفلوس اللي هتتحصل من تقنين الأوضاع مش هتروح بعيد، بالعكس، هتتخصص بالكامل لتطوير المنطقة نفسها، سواء في رصف الطرق أو تحسين المرافق والخدمات.
وكل الخطوات دي هدفها إن شق الثعبان تبقى واحدة من أهم مدن صناعة الرخام في العالم، وتتحول لنقطة جذب للمستثمرين من داخل مصر وخارجها.
