العلاوة السنوية في قانون العمل الجديد.. مين يستحقها وبتتحسب إزاي؟

لو انت شغال في شركة أو مؤسسة في مصر، لازم تعرف إن قانون العمل الجديد رقم 14 لسنة 2025 حدد قواعد واضحة للعلاوة السنوية.

القانون بيقول إن أي عامل من حقه يحصل على علاوة دورية كل سنة، لكن بشرط مهم إنه يكون عدى سنة كاملة من تاريخ تعيينه في الشغل.. كمان لازم العامل يكون مستمر في شغله بشكل طبيعي، من غير مخالفات جسيمة أو مشاكل كبيرة تأثر على تقييمه في الشغل.

طيب العلاوة دي بتكون كام؟ القانون حدد إن العلاوة السنوية ما تقلش عن 3% من الأجر التأميني للعامل. والنسبة دي ممكن تزيد حسب سياسة الشركة أو الاتفاقيات بين الإدارة والنقابات.

والنقطة المهمة إن العلاوة بتتحسب ضمن الأجر الأساسي. وده معناه إنها بتأثر على التأمينات والمعاشات بعد كده، يعني فائدتها مش بس في المرتب دلوقتي لكن كمان في المستقبل.

طب هل العلاوة دي زي الحوافز أو المكافآت؟ لا، في فرق كبير. العلاوة الدورية حق قانوني ثابت لكل عامل تنطبق عليه الشروط، وبتتصرف كل سنة.

لكن الحوافز والمكافآت بتكون مرتبطة بأداء العامل أو أرباح الشركة، وممكن تزيد أو تقل حسب الظروف.. وفي حالة واحدة بس ممكن العلاوة ما تتصرفش بالكامل، لو الشركة بتمر بظروف اقتصادية صعبة جدًا.

وفي الحالة دي لازم يتم عرض الموضوع على المجلس القومي للأجور خلال 30 يوم، وهو اللي يقرر هل يتم تخفيض العلاوة أو إعفاء الشركة منها مؤقتًا.. يعني لو اشتغلت سنة كاملة ومستمر في شغلك، من حقك قانونًا تاخد علاوة سنوية على مرتبك.