هل الأخت ليها معاش لو المتوفي عنده أولاد؟ القانون يحسم الجدل
سؤال بيتكرر كتير.. لو شخص متوفي أو صاحب معاش، وعنده أولاد، هل أخته من حقها تاخد معاش؟ ولا وجود الأولاد يمنعها تمامًا؟
الإجابة جاية من قانون التأمينات الاجتماعية الموحد رقم 148 لسنة 2019 .. القانون حط شروط واضحة جدًا عشان الأخت تستحق معاش عن أخوها.
أول شرط وأساسي، لازم تكون غير متزوجة، لو متزوجة، مفيش استحقاق، تاني شرط مهم .. موضوع الإعالة.
يعني إيه؟ يعني ما يكونش فيه حد من أولاد المؤمن عليه أو صاحب المعاش سبق واستحق المعاش، بمعنى أبسط.. لو الأولاد مستحقين فعلًا للمعاش وبيصرفوا، ده بيأثر على أحقية الأخت.
كمان القانون بيقول إن الأخت أو الأخ، ما يكونش ليهم دخل من أي مصدر، يساوي نصيبهم في المعاش أو يزيد عنه.
يعني لو دخلها الشهري قد نصيبها في المعاش أو أكتر، ساعتها مفيش استحقاق.. مش بس كده.. لو فيه أب أو ابن أو بنت للأخت، ومتوسط دخلهم كلهم من أي مصدر، يساوي قيمة معاش المتوفي أو يزيد عليه، برضه ده يمنع الاستحقاق.
لكن خلي بالك، المعاش اللي حد بياخده عن شخص تاني، ما بيتحسبش ضمن الدخل في الحالة دي.. يعني وجود أولاد للمؤمن عليه مش معناه تلقائي إن الأخت محرومة.
لكن الموضوع مرتبط بشروط محددة جدًا: حالتها الاجتماعية، دخلها، وهل فيه مستحقين أولاد بالفعل ولا لأ.. لو عندك حالة مشابهة، راجع الشروط كويس قبل ما تقدم، عشان تعرف حقك القانوني بالظبط.
