مواعيد وطرق سداد شقق سكن مصر وجنة.. اعرف هتدفع كام وإمتى

لو حاجز في سكن مصر أو جنة في المنصورة الجديدة.. الفيديو ده مهم جدًا ليك.. وزارة الإسكان أعلنت رسميًا مواعيد سداد أقساط الوحدات اللي اتطرحت مؤخرًا، وده بالنسبة للناس اللي وصلهم رسالة نصية فيها تفاصيل السداد والتسليم.
أول حاجة.

الدفع هيبدأ من يوم 26 مارس، يعني بعد إجازة عيد الفطر مباشرة. والسداد هيكون من خلال بنك التعمير والإسكان، وده شرط أساسي عشان تكمل إجراءات التخصيص وتستلم شقتك.

طيب نظام الدفع ماشي إزاي؟ بعد ما دفعت مقدم الحجز، المطلوب الآتي.. أول خطوة: تسدد باقي الـ20% من إجمالي ثمن الوحدة، وبيضاف عليهم 1% مصاريف إدارية، وده خلال شهرين من انتهاء فترة الحجز.

تاني خطوة: عند الاستلام، بتدفع 10% من سعر الشقة، غير وديعة الصيانة.. يتبقى 70% من سعر الوحدة ودي بتتقسط على أقساط ربع سنوية متساوية.

قدامك تختار مدة السداد:
3 سنين
أو 5 سنين
أو 7 سنين
وطبعًا بيضاف على الأقساط الفايدة المعلنة من البنك المركزي وقت الطرح، وكمان 2% طبقًا لتعليمات وزارة المالية، و0.5% مصاريف تحصيل.

طيب أول قسط إمتى؟ أول قسط بيبدأ بعد 3 شهور من تاريخ استلام الوحدة.. وكمان لازم تقدم شيكات آجلة بكل الأقساط قبل ما تستلم الشقة.. يعني ابدأ حساباتك من دلوقتي، وشوف المدة المناسبة ليك عشان تقدر تلتزم بالأقساط من غير ضغط.