الحكومة تتابع موقف مخزون أرصدة السلع الغذائية.. حرب إيران تقفز بأسعار الدهب.. ومصر للطيران تلغي عدد من الرحلات
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، الحكومة تتابع موقف مخزون أرصدة السلع الغذائية، وحرب إيران تقفز بأسعار الدهب، ومصر للطيران تلغي عدد من الرحلات.
والبداية من وزارة التموين.. الوزير شريف فاروق أكد إن عندنا مخزون آمن من كل السلع الأساسية، والأرصدة اللي موجودة تكفينا لشهور قدام.
وأوضح إن الوزارة مستمرة في ضخ السلع بالأسواق، ومتابعة الأسعار لحظة بلحظة بالتنسيق مع كل الجهات، عشان يضمنوا إن السوق ينضبط لمصلحة المواطن.
الوزير قال في بيان لمجلس الوزراء النهارده، إنه مش هيسمح بأي احتكار أو زيادات مالهاش لزمة في الأسعار، خصوصاً وإحنا داخلين على شهر رمضان الكريم. وتصريحات الوزير دي جت في ظل التطورات اللي بتحصل في المنطقة من الصبح.
مجلس الوزراء ذكر كمان إنه "بسبب الأحداث اللي بتمر بيها المنطقة، ومتابعة للاجتماع اللي حصل أول امبارح، الدكتور مصطفى مدبولي رئيس الوزراء تابع النهارده مع وزير التموين موقف مخزون السلع الغذائية الاستراتيجية". وده طبعاً بعد ما بدأت أمريكا وإسرائيل هجوم على إيران، بعد أسابيع من التهديدات والتحشيد العسكري في الشرق الأوسط.
ونروح لسوق الصاغة.. أسعار الذهب والعة النهارده وشايفة ارتفاع كبير خلال التعاملات، رغم إن البورصات العالمية قافلة، وده طبعاً بسبب العملية العسكرية ضد إيران اللي خلت الناس تجري تشتري الذهب كـ "ملاذ آمن".
عيار 24: وصل سعر الجرام لـ 8250 جنيه، وده لسه أغلى عيار من حيث الجودة والنقاء، ومطلوب جداً من المستثمرين اللي بيدوروا على الذهب الخام، رغم إن الإقبال عليه قليل شوية بسبب سعره العالي.
عيار 21: سجل 7250 جنيه للجرام، ولسه هو العيار "البريمو" والأكثر مبيعاً في السوق المصري، والناس دايماً بتعتمد عليه في الادخار والجواز.
عيار 18: وصل لـ 6214 جنيه، وده شغال كويس جداً مع الشباب عشان سعره أهدى شوية وتصميماته شيك وعصرية.
عيار 14: سجل حوالي 4833 جنيه، ولسه بيجذب الناس اللي بتدور على حلول اقتصادية عشان يشتروا ذهب سواء للتحويش أو للهدايا.
الجنيه الذهب: وصل سعره لـ 58000 جنيه، ولسه هو الملك في الهدايا والمناسبات، وسهل جداً في بيعه وشراه وقيمته ثابتة.
ونروح لشركة "مصر للطيران" اللي أعلنت وقف رحلاتها الجوية من القاهرة لعدد من المدن وهي: (الكويت – دبي – الدوحة – البحرين – أبوظبي – الشارقة – القصيم – الدمام – أربيل – بغداد – عمّان – بيروت – مسقط)، والقرار ده مستمر لحد إشعار آخر.
وفي نفس السياق، الطيار أحمد عادل، رئيس الشركة القابضة لمصر للطيران، بيتابع كل اللي بيحصل في المنطقة من جوه "غرفة الأزمات" بمركز العمليات، وبالتنسيق الكامل مع مطار القاهرة والمحطات الخارجية للشركة عشان يطمنوا على حركة التشغيل. ومصر للطيران أكدت إنها هتعرف عملائها بأي جديد أول ما يصدر فوراً.
