مكاسب ضخمة لمصر.. منجم السكري يسجل 500 ألف أونصة ذهب
هل إنتاج 500 ألف أونصة من الذهب في السنة رقم كبير فعلًا لمصر؟، وإزاي منجم السكري بقى واحد من أهم مصادر الذهب في المنطقة؟، وهل زيادة الإنتاج معناها دخل أكبر للاقتصاد المصري؟، ومصر بتستفيد إيه فعليًا من المنجم غير الضرائب؟، وهل ممكن يتحول قطاع التعدين لنفس قوة قطاع البترول في مصر؟، وليه شركات عالمية كبيرة مهتمة بالاستثمار في مناجم الذهب المصرية؟
خلينا نتكلم عن رقم كبير شوية، 500 ألف أونصة ذهب.. ده مش رقم بسيط، ده حجم الإنتاج اللي حققه منجم السكري خلال سنة 2025، وده يعتبر واحد من أهم الأخبار في ملف التعدين والاقتصاد في مصر.
المنجم ده يعتبر أكبر منجم ذهب في مصر، وواحد من أهم مشروعات التعدين في المنطقة كلها، الجديد إن البيانات اللي أعلنتها شركة أنجلو جولد أشانتي، بتقول إن الإنتاج وصل لنحو نص مليون أونصة خلال سنة واحدة، بزيادة حوالي 4% عن السنة اللي قبلها.
يمكن الرقم يبدو بسيط في الزيادة، لكن في عالم التعدين ده معناه أن في تحسن واضح في كفاءة التشغيل واستخراج الذهب من الأرض.. الفكرة أن استخراج الذهب مش عملية سهلة، الموضوع بيحتاج تكنولوجيا متطورة ومعدات تقيلة، وعمليات معالجة معقدة علشان يتم فصل الذهب عن الصخور، علشان كده أي زيادة في الإنتاج معناها أن العمليات بقت أكثر كفاءة وإن الاستثمار اللي بيتضخ في المشروع بيبدأ يجيب نتيجة.
الشركة كمان أعلنت أنها استثمرت حوالي 262 مليون دولار خلال 2025 لتطوير المنجم وتحسين العمليات، ومش بس كده، في خطة لضخ حوالي 126 مليون دولار كمان خلال الفترة الجاية.. الاستثمارات دي بتروح لحاجات مهمة زي إزالة المخلفات التعدينية وتطوير المعدات، وتحسين طرق الاستخراج علشان الإنتاج يفضل مستقر لسنين قدام.
طيب السؤال المهم بقى، إيه اللي مصر بتاخده من ده؟، المنجم بيشتغل بنظام شراكة، ومصر ليها 50% من الأرباح، غير كده في حقوق امتياز بتتدفع للدولة، السنة اللي فاتت بس الشركة دفعت حوالي 53 مليون دولار كرسوم امتياز.. يعني من الآخر كل ما الإنتاج يزيد العائد اللي داخل للدولة بيزيد.
كمان لازم نفهم أن الذهب دلوقتي واحد من أهم المعادن في العالم، خصوصًا مع التوترات الاقتصادية والسياسية اللي بتحصل عالميًا، والمستثمرين دايمًا بيهربوا للذهب وقت الأزمات لأنه بيعتبر ملاذ آمن، وده بيخلي وجود منجم كبير زي السكري ميزة استراتيجية لمصر.
الموقع نفسه ليه دور مهم، المنجم موجود في الصحراء الشرقية قريب من مرسى علم وعلى مسافة مناسبة من مواني التصدير على البحر الأحمر، وده بيسهل نقل الذهب والمواد الخام وتشغيل المشروع بكفاءة.
الحكومة كمان بتراهن على قطاع التعدين بشكل عام، مش بس السكري، الفكرة أن مصر فيها ثروات معدنية كبيرة، لكن لسنين طويلة ماكانش فيه استغلال كامل ليها، لكن دلوقتي في محاولات لجذب شركات عالمية وتقديم تسهيلات أكبر علشان الاستثمار يزيد.. ولو بصينا للصورة الكبيرة، هنلاقي أن منجم السكري مش مجرد منجم ذهب وخلاص، ده نموذج ممكن يتكرر في مناطق تانية في مصر.
