البطة بـ600 جنيه.. ارتفاع غير مسبوق لأسعار البط قبل رمضان
قبل ما تجهز سفرة أول يوم رمضان خلي بالك من المفاجأة دي.. الإقبال الكبير على البط والوز والحمام قلب الموازين في السوق، والأسعار ولعت قبل بداية الشهر الكريم بأيام.
بحسب تصريحات حسين عبد الرحمن أبو صدام، نقيب عام الفلاحين، سعر كيلو البط والوز وصل لـ120 جنيه بدل ما كان حوالي 50 جنيه، وده خلى البطة وزن 5 كيلو توصل لـ600 جنيه كاملة.
مش بس كده زوج الحمام كمان ارتفع لحد 170 جنيه، والسبب؟ الطلب العالي جدًا من المصريين على الأكلات دي تحديدًا في أول يوم رمضان، باعتبارها “أكلة افتتاحية” على سفرة الشهر الكريم.
التوقعات بتقول إن موجة الارتفاع دي ممكن تفضل مستمرة لحد يوم 15 رمضان، مع استمرار الإقبال القوي.
لكن في المقابل، في خبر احسن شوية بخصوص اللحوم الحمراء، اللي متوقع تشهد استقرار نسبي بسبب توافرها بكميات كبيرة في المنافذ الحكومية بأسعار مخفضة، بعد جهود من وزارتي التموين والزراعة لطرح السلع بتخفيضات خلال الموسم الحالي.
يعني لو ناوي تعزم على بط أو حمام أول يوم جهّز ميزانية أعلى شوية.. أما لو بتفكر فبديل، اللحمة الحمراء ممكن تكون الخيار الأهدى سعرًا في الفترة دي.
