سقوط عصابة الفراخ البيضاء.. مين بيتحكم في أسعار الدواجن؟
عمرك سألت نفسك ليه سعر الفراخ بيعلى فجأة وبعد كده مش بينزل تاني.. ومين المتحكم في الأسعار دي؟ طب لو قلتلك إن في اتفاقات سرية كانت بتتحط علشان تتحكم في السوق؟
النيابة العامة أعلنت إحالة عدد من المتهمين للمحاكمة الجنائية بتهمة ارتكاب ممارسات احتكارية في سوق الدواجن البيضاء.
القصة بدأت ببلاغ من جهاز حماية المنافسة ومنع الممارسات الاحتكارية، بيتكلم عن وجود اتفاقات بين شوية سماسرة لتحديد أسعار الفراخ في السوق.
التحقيقات اعتمدت على دراسة فنية واقتصادية وتحليل أرقام التسعير وحركة البيع خلال فترة معينة.
النتيجة؟ كان في نمط متكرر في الأسعار المعلنة، الأسعار بتتحرك مع بعض بشكل متطابق، أكتر من الطبيعي اللي يحصل بسبب العرض والطلب أو اختلاف التكلفة بين منطقة والتانية.
كمان التحليل أثبت إن في ارتباط مباشر وفوري بين الأسعار اللي بيعلنوها، وده معناه إن الموضوع ماكانش صدفة، ده كان تنسيق واتفاق مسبق، سواء برفع السعر أو خفضه أو حتى تثبيته.
وبناءً على ده، النيابة قررت إحالتهم للمحاكمة الجنائية طبقًا لقانون حماية المنافسة ومنع الممارسات الاحتكارية، وأكدت إن أي نشاط اقتصادي لازم يخضع للقانون، ومفيش حد فوق قواعد السوق.
