7 خطوات تحمي بيهم فلوسك من السـ ـرقة.. رسالة واحدة تضيع تحويشة العمر
تخيل تصحى الصبح تفتح موبايلك، تلاقي رسالة خصم من حسابك بمبلغ إنت ما صرفتوش، ولا عملت تحويل، ولا اشتريت حاجة.
يبقى إيه اللي حصل؟.. ببساطة وقعت في شباك نصاب.
في الفترة الأخيرة، النصب البنكي بقى أشكال وألوان، رسائل، مكالمات، لينكات، عروض مغرية، وكلها هدفها حاجة واحدة: ياخدوا بياناتك ويسحبوا فلوسك.
طب تحمي نفسك إزاي؟
أولًا:
خد بالك من الرسائل المزيفة، لو جالك إيميل أو رسالة فيها لينك وبيقولك "ادخل حدّث بياناتك" أو "في مشكلة في حسابك"، ماتدوسش، ادخل على موقع البنك بنفسك واكتب العنوان بإيدك.
ثانيًا:
مفيش بنك هيطلب منك الرقم السري، أو الـ PIN، أو كلمة السر، أو رمز التحقق اللي بيجيلك في رسالة، أي حد يطلبهم منك، حتى لو صوته رسمي جدًا، اعرف إنه نصاب.
ثالثًا:
استخدم كلمة سر قوية ومعقدة، حروف كبيرة وصغيرة، أرقام ورموز، ومتستخدمش نفس الباسورد في كل حاجة.
رابعًا:
أوعى تنخدع بعرض مغري قوي: قرض فوري، استثمار مضمون، جائزة كسبتها فجأة، العروض الحقيقية بتكون من خلال القنوات الرسمية للبنك بس.
خامسًا:
راجع حسابك البنكي باستمرار، أي حركة غريبة؟ بلّغ فورًا.
سادسًا:
لو حد كلمك وقالك إنه من البنك وطلب بياناتك، اقفل وكلم البنك بنفسك من الرقم المكتوب على ضهر الكارت.
وأخيرًا، حدّث تطبيق البنك دايمًا عشان تتفادى أي ثغرات.
خليك عارف إن النصاب ذكي، بس إنت تقدر تبقى أذكى، من خلال حماية بياناتك تفدر تحمي فلوسك.
