مش تمويل عقاري ولا إسكان اجتماعي.. أفضل اختيار لو عايز شقة بتسهيلات

في ناس كتير فاكرة إن قدامها طريقين بس علشان تشتري شقة يا تمويل عقاري بشروطه وبنوكه يا إسكان اجتماعي بقيوده.. لكن في اختيار تالت موجود وناس كتير مش واخدة بالها منه.

شقق بتطرحها شركات تابعة لوزارة قطاع الأعمال العام وحدات سكنية بمواصفات قوية وأسعار بتدخل منافسة مباشرة مع أي نظام تمويل تقليدي.. الشقق دي بتيجي بتشطيب عالي وموجودة في مواقع مميزة سواء في مدن جديدة أو مناطق قديمة.

والمقدم في مشروعات كتير بيبدأ من 10% بس والباقي تقسيط مباشر مع الشركة من غير بنوك ومن غير فوائد تمويل عقاري.. من الشركات اللي بتطرح النوع ده من الوحدات شركة المعادي للتنمية والتعمير وشركة مصر الجديدة للإسكان والتعمير وشركة النصر للإسكان والتعمير وشركة المعمورة للتعمير والتنمية السياحية وشركة التعمير للتنمية والإدارة.

والمشروعات نفسها متنوعة ما بين إسكان متميز وفوق متوسط داخل القاهرة الكبرى وكمبوندات سكنية ومدن متكاملة في المدن الجديدة.. ووحدات جاهزة أو تحت التنفيذ بمساحات مختلفة، وبالتالي لو التمويل العقاري مش مناسبك أو شروط الإسكان الاجتماعي معقدة بالنسبة لك شقق شركات قطاع الأعمال بتبقى حل عملي يجمع بين سعر أوضح وتسهيلات مباشرة وجودة تنفيذ أعلى.