أوروبا تفتح خزائنها لمصر.. 4 مليارات يورو هينعشوا خزينة الدولة
هو ليه الاتحاد الأوروبي يطلع مليار يورو مرة واحدة لمصر.. وليه كمان يتكلم عن 3 مليارات يورو تانيين جايين في الطريق .. وليه الدعم ده بييجي في التوقيت ده بالذات.. والفلوس دي رايحة فين وبتعمل ايه في اقتصاد تعبان من ضغوط سنين طويلة؟
مصر أعلنت إنها استلمت فعلا مليار يورو من الاتحاد الأوروبي ضمن برنامج دعم اقتصادي كبير وممتد والرقم ده مش مجرد قرض عادي ده تمويل ميسر مرتبط بإصلاحات اتنفذت بالفعل على الأرض وده معناه إن الفلوس دي جايه مقابل شغل حقيقي اتعمل في إدارة الاقتصاد مش وعود ولا كلام على ورق.
الدعم الأوروبي لمصر مش صدفة ولا مجاملة سياسية الموضوع أعمق من كده بكتير الاتحاد الأوروبي شايف إن استقرار مصر الاقتصادي عنصر أساسي لاستقرار المنطقة كلها مصر شريك تجاري ضخم بوابة لأفريقيا وخط دفاع أساسي ضد موجات هجرة غير شرعية وأي اهتزاز اقتصادي فيها بيرجع صداه مباشرة على أوروبا.
علشان كده الاتحاد الأوروبي دخل مع مصر في شراكة استراتيجية قائمة على إن الفلوس تيجي مقابل إصلاحات واضحة تحسين إدارة الموازنة ضبط المالية العامة تطوير طريقة التخطيط للإنفاق وإطالة عمر الدين بدل ما يفضل قصير ومكلف ودايما عامل ضغط على الدولة.
المليار يورو اللي اتصرفوا دلوقتي جزء من حزمة أكبر قيمتها 5 مليارات يورو مصر كانت استلمت مليار قبل كده في بداية 2025 ودلوقتي مليار تاني ومعاهم 3 مليارات هيتم صرفهم على شريحتين خلال 2026 وده بيدي نفس طويل للاقتصاد وبيقلل الاحتياج للاقتراض السريع من الأسواق الدولية بأسعار فائدة عالية.
الحكومة بتستخدم النوع ده من التمويل علشان تخفف الضغط الفوري على الموازنة بدل ما تسدد ديون قصيرة الأجل وتدخل في دوامة إعادة تمويل مكلفة الفكرة إن الدين يبقى أطول وأهدى والتكلفة أقل وده يدي مساحة إن الفلوس تروح للتعليم والصحة والدعم الاجتماعي ومشروعات البنية الأساسية.
جزء كبير من الإصلاحات اللي اتنفذت كان هدفه تحسين بيئة الاستثمار وتسهيل التراخيص وتنظيم تخصيص الأراضي الصناعية وده معناه جذب استثمارات جديدة بدل الاعتماد على القروض بس وفي نفس الوقت في تركيز واضح على التحول الأخضر وترشيد الطاقة وإدارة المياه وحماية الموارد الطبيعية خصوصا في مناطق حساسة زي البحر الأحمر.
الاتحاد الأوروبي مش بيدفع الفلوس دي من باب المجاملة هو بيدفع علشان يشوف اقتصاد مصري أكثر استقرار وأكثر قدرة على النمو وده مكسب مشترك لمصر ولمحيطها الأوروبي لأن أي نمو هنا بيخلق فرص تجارة وشراكة هناك.
الدعم ده رسالة ثقة مهمة للأسواق العالمية لما جهة بحجم الاتحاد الأوروبي تحط مليارات يورو في اقتصاد دولة ده بيبعت إشارة إن في مسار إصلاحي ماشي وإن المخاطر تحت السيطرة وده بيساعد الدولة في مفاوضاتها التمويلية المستقبلية.
