من الغاز للكهربا.. إزاي مصر بتتحرك لمواجهة أزمات الطاقة قبل ما تحصل؟
عمرك سألت نفسك.. إيه اللي ممكن يحصل لو الغاز انقطع فجأة؟ كهربا، مصانع، أسعار، اقتصاد… كله ممكن يتأثر في لحظة!
بس اللي ناس كتير متعرفوش إن مصر دلوقتي بتتحرك بخطة محسوبة.. خطة بتجهّز البلد لأي أزمة جاية من برّه.. سواء اضطرابات إقليمية، توترات سياسية.. أو حتى مشاكل مفاجئة في خطوط الإمداد.
النهارده هنتكلم عن إزاي القاهرة بتأمّن الغاز؟.. وليه الحكومة قررت ما تعتمدش على مصدر واحد؟.. وإزاي القرارات دي ممكن تحمي كل بيت مصري من العتمة!
مصر من أكتر الدول اللي بتعتمد على الغاز الطبيعي، مش بس في الكهرباء، لكن كمان في الصناعة، والأسمدة، والبتروكيماويات، يعني أي خلل في الغاز… بيأثر على الاقتصاد كله.
طل ليه الموضوع بقى حساس دلوقتي؟ المنطقة حوالينا مش مستقرة، وفي اضطرابات إقليمية ممكن في أي وقت تأثر على خطوط إمداد الغاز، وده خلّى الحكومة المصرية تاخد قرار مهم جدًا: مينفعش نعتمد على مصدر واحد وبس.. لأن المصدر الواحد معناه مخاطرة كبيرة.
وعشان تنويع المصادر الدولة بدأت تتحرك في اتجاه الغاز الطبيعي المسال، وده غاز بيتسيّل ويتنقل بالسفن، يعني مش مربوط بخط أنابيب واحد.
الميزة هنا إنك تقدر تجيب الغاز من أكتر من دولة، وفي أي وقت، حسب احتياجك. وده بيدّي مصر مرونة وسرعة تصرّف لو حصل أي انقطاع مفاجئ.
ووسط التحرك ده جه التعاون مع قطر. وده تعاون مهم جدا .. ليه؟ قطر واحدة من أكبر موردي الغاز المسال في العالم، والتعاون معاها مش مجرد صفقة وخلاص، ده جزء من شبكة أمان بتتبني.
الفكرة إنك وقت الذروة – خصوصًا في الصيف – تكون ضامن إن عندك غاز يكفي محطات الكهرباء وما تدخلش في سيناريو تخفيف أحمال أو ضغط على الشبكة.
ومن ضمن التوجه لتنويع الإمدادات اللجوء إلى العقود طويلة الأجل الحكومة مش بتفكر بمنطق "نحل الأزمة ونشوف بعدين"، لكن بتشتغل على عقود طويلة الأجل.
العقود دي: بتضمن استقرار في الإمدادات بتقلل مفاجآت الأسعار وبتدي رؤية أوضح للتخطيط الاقتصادي وده معناه إن الدولة بتخطط لقدّام مش بتطفّي حرائق.
ليه أمن الطاقة مسألة أمن قومي؟ خلّينا نقولها بصراحة: الطاقة تعني الحياة، فمن غير كهربا: مصانع بتقف- عمالة بتتأثر- أسعار بتزيد- وضغط على المواطن عشان كده أمن الطاقة بقى جزء من الأمن القومي المصري، زيه زي الغذاء والمياه بالظبط. وأي خطوة في الاتجاه ده هي استثمار في استقرار البلد مش تكلفة وخلاص.
اللي بيحصل دلوقتي إن مصر بتحاول تتحرر من فكرة "مصدر واحد، خط واحد، خيار واحد". وكل ما البدائل تزيد كل ما المخاطر تقل وكل ما البلد تبقى أقوى قدّام أي أزمة جاية.
يمكن المواطن ما يحسّش بالقرارات دي دلوقتي، لكن وقت الأزمات… هي دي القرارات اللي بتفرّق بين بلد بتعرف تعدّي، وبلد بتدفع تمن كبير. أمن الطاقة مش خبر اقتصادي وبس، ده خبر يخص كل بيت، وكل لمبة بتنور،وكل مصنع شغال.
