بحكم المحكمة.. إيه قصة إلغاء قانون الإيجار القديم
إلغاء قانون الإيجار القديم.. ده الكلام اللي انتشر خلال الساعات اللي فاتت.. لكن ايه قصة الكلام ده.. وهل هو حقيقة ولا لا.
طارق جبر المحامي بالاستئناف العالي ومجلس الدولة أكد إن قانون الإيجار القديم مازال ساري ونافذ ومفيش إلغاء له.
وكل اللي بيتقال دلوقتي مجرد مقترحات لتعديل بعض البنود من غير مساس بجوهر القانون، خصوصا إنه متوافق مع أحكام المحكمة الدستورية العليا.
طارق جبر وضح إن الدستورية حسمت 3 نقاط مهمة، أولها إن عقود الإيجار مينفعش تستمر للأبد، وثانيها ضرورة تحريك القيمة الإيجارية، وثالثها مراعاة استقرار الأسر وحقوق الملاك.
وكشف إن الدولة حطت فترة انتقالية 7 سنين يتم فيها رفع الإيجار بشكل تدريجي، مع توفير بدائل سكنية لغير القادرين زي الإيجار المدعوم أو الإيجار التمليكي أو التمليك المباشر.
كمان أكد إن أي وحدة مقفولة أكتر من سنة هترجع للمالك، والهدف في النهاية تحقيق توازن عادل بين المالك والمستأجر.
