إيه اﻷهمية اﻻقتصادية لفنزويلا؟ وليه أمريكا مهتمة بالسيطرة على كنوزها البترولية؟
هو ايه أهمية دولة زي فنزويلا؟ وليه أمريكا مهتمة أوي بالسيطرة عليها كده؟ وإيه حكاية احتياطيات النفط الكبيرة اللى بتملكها؟
فنزويلا واحدة من اغنى دول العالم من حيث الموارد الطبيعية وبالأخص النفط احنا بنتكلم عن اكبر احتياطي نفطي مؤكد على مستوى العالم باجمالي احتياطي يتجاوز 303 مليار برميل رقم يتفوق على السعودية وكندا وايران وكل دول اوبك تقريبا وده معناه ان فنزويلا لوحدها تمتلك اكتر من 17 في المية من احتياطي النفط العالمي الرقم ده مش مجرد رقم على ورق ده قوة اقتصادية مرعبة قادرة تغير موازين اسواق الطاقة في العالم كله لو اتوظفت صح.
مش بس نفط فنزويلا كمان عندها احتياطيات ضخمة من الغاز الطبيعي تقدر بحوالي 5.7 تريليون متر مكعب وعندها معادن نادرة زي الذهب والبوكسيت والحديد وكمان موقع جغرافي استراتيجي في امريكا الجنوبية قريب من الكاريبي وخطوط الملاحة الدولية كل ده بيخلي فنزويلا كنز حقيقي مش دولة عادية.
طيب أمريكا ليه مهتمة اوي بالسيطرة على فنزويلا؟
الموضوع هنا اقتصادي قبل اي حاجة امريكا اكبر مستهلك نفط في العالم واي دولة تقدر تأثر على سوق النفط العالمي تبقى خطر او فرصة امريكا تاريخيا كانت بتعتبر فنزويلا مصدر مهم للنفط خصوصا في فترة ما قبل العقوبات وكانت الشركات الامريكية ليها وجود قوي هناك.
لكن مع وصول هوجو تشافيز للحكم وبعده نيكولاس مادورو السياسة اتغيرت بالكامل الدولة اتجهت لتأميم قطاع النفط وطرد شركات اجنبية كتير وتقريب العلاقات مع روسيا والصين وايران وده كان خط احمر بالنسبة لواشنطن لان ببساطة فنزويلا بقت خارج السيطرة الامريكية وبقت جزء من معسكر مناهض للنفوذ الغربي.
امريكا فرضت عقوبات اقتصادية خانقة على فنزويلا بداية من 2017 العقوبات دي خنقت قطاع النفط بشكل مباشر الانتاج نزل من اكتر من 3 ملايين برميل يوميا في بداية الالفينات لاقل من 800 الف برميل في بعض الفترات ده اثر على دخل الدولة وخلى الاقتصاد ينهار والتضخم يوصل لمعدلات فلكية والشعب يدفع التمن.
لكن رغم كل ده فنزويلا فضلت محتفظة بثروتها تحت الارض وده اللي مخلي أمريكا ما ترفعش عينها عنها لان اي تغيير سياسي هناك ممكن يفتح الباب قدام اعادة ضخ ملايين البراميل في السوق العالمي وده سلاح قوي جدا سواء لتخفيض اسعار النفط او للضغط على دول منافسة زي روسيا وايران.
كمان امريكا عارفة ان الصين وروسيا دخلوا بقوة في فنزويلا الصين اقرضت كاراكاس اكتر من 60 مليار دولار على مدار سنين مقابل نفط وروسيا استثمرت في حقول النفط والبنية التحتية وده معناه ان خسارة فنزويلا مش بس خسارة نفط لكن خسارة نفوذ استراتيجي في منطقة تعتبرها امريكا تاريخيا ساحة نفوذ مباشر ليها.
الخلاصة ان فنزويلا مش دولة فقيرة ولا فاشلة بطبيعتها فنزويلا دولة غنية بشكل استثنائي لكن محاصرة بصراع مصالح دولية ضخمة النفط هو قلب المعركة والاحتياطي الهائل هو السبب الرئيسي وامريكا مش بتدور على الديمقراطية ولا حقوق الانسان قد ما بتدور على السيطرة على واحد من اهم مفاتيح الطاقة في العالم واللي يكسب فنزويلا يكسب ورقة ضغط اقتصادية وسياسية تغير شكل اللعبة الدولية بالكامل.
