زلزال هيغير شكل الصراع العالمي.. الصين توجه أكبر ضربة اقتصادية لأمريكا
هو معقول الصين توصل للمرحلة دي وامريكا كانت متأكدة انه مستحيل يحصل؟ وهل فعلا في آلة واحدة تقدر تقلب موازين اخطر صناعة في العالم وتكسر احتكار الغرب اللي فضل سنين طويلة ماسك مفاتيح التكنولوجيا المتقدمة؟ وهل اللي بيحصل ده مجرد تجربة ولا بداية زلزال هيغير شكل الصراع العالمي كله اللي قدامنا؟
اللي حصل ان الصين من فترة قريبة حققت اختراق تكنولوجي خطير جدا في واحد من اعقد واهم المجالات في العالم وهو مجال صناعة الرقائق الالكترونية وده المجال اللي بيغذي كل حاجة حوالينا من الموبايل اللي في ايدك للذكاء الاصطناعي للاسلحة المتطورة ومقاتلات الجيل الخامس والسادس وكل ما هو مرتبط بالقوة العسكرية والاقتصادية للدول الكبرى.
القصة بتبدأ من مكان محدش كان سامع عنه ولا متوقع ان يطلع منه التغيير ده كله معمل فائق السرية في مدينة شينزن المدينة اللي بيسموها وادي السيليكون الصيني المعمل ده اشتغل في صمت تام سنين طويلة من غير صور ولا تسريبات ولا اسماء ولا اي معلومات تدل على ان فيه مشروع استراتيجي بالحجم ده شغال تحت الارض.
جوه المكان ده فريق من افضل المهندسين الصينيين اشتغلوا على تصنيع آلة كانت امريكا والغرب متأكدين ان الصين مش هتعرف توصل لها قبل عقود طويلة آلة اسمها EUV وهي اختصار لتكنولوجيا الطباعة الحجرية بالاشعة فوق البنفسجية القصوى وهي قلب صناعة اشباه الموصلات الحديثة والاداة الوحيدة القادرة على تصنيع شرائح بدقة نانومترية فائقة بتوصل في بعض الحالات لحد 2 نانومتر.
التكنولوجيا دي كانت محتكرة بالكامل تقريبا من شركة واحدة في العالم موجودة في هولندا وامريكا كانت فارضة حظر صارم يمنع تصديرها للصين من سنين بهدف تعطيل تقدمها في سباق الذكاء الاصطناعي والتسليح المتقدم وفضل الغرب مطمن ان الصين طول ما هي محرومة من الآلة دي هتفضل دايما متأخرة خطوة او اتنين.
لكن اللي الغرب ماخدش باله منه ان الصين قررت تلعب لعبة طويلة النفس وبدل ما تحاول تشتري التكنولوجيا قررت تصنعها بنفسها بنفس منطق مشروع مانهاتن الامريكي في الاربعينات لما امريكا جمعت اكبر عقولها العلمية وصنعت اول قنبلة نووية في سرية تامة.
الصين عملت نفس الحاجة جمعت افضل المهندسين اللي اشتغلوا قبل كده في الشركات الغربية بعضهم رجع بعقود مغرية ودعم كامل وبعضهم كان متقاعد وتم اعادة تشغيله وفور دخولهم المشروع استلموا هويات جديدة واشتغلوا في عزلة كاملة من غير موبايلات ومن غير خروج ومن غير معرفة الصورة الكاملة للمشروع.
كل فريق كان شغال على جزء صغير جدا من الآلة من غير ما يعرف باقي الصورة والاشراف كان مباشر من اعلى مستويات القيادة في بكين والنتيجة بعد سنين طويلة من العمل المتواصل ان الصين نجحت تصمم نموذج اولي شغال لآلة EUV قادرة على توليد ضوء الاشعة فوق البنفسجية القصوى وده كان اصعب تحدي في المشروع كله.
الخبراء الغربيين كانوا شايفين ان الوصول للنقطة دي محتاج لحد 2040 لكن المصادر بتتكلم دلوقتي عن 2028 كهدف رسمي و2030 كموعد واقعي للتشغيل الكامل يعني الصين اختصرت عشر سنين مرة واحدة.
لحد دلوقتي الآلة لسه مش بتنتج شرائح تجارية بكفاءة عالية لكن المهم ان اصعب مرحلة اتعدت وبقى الموضوع مسألة وقت وتحسينات مش اكتر ولو ده حصل الغرب هيخسر اقوى ورقة ضغط استراتيجية كانت عنده على الصين.
ساعتها الصين هتقدر تصنع بنفسها شرائح الذكاء الاصطناعي الاسلحة الذكية المقاتلات المتطورة انظمة الحرب السيبرانية وكل ده من غير ما تحتاج الغرب ولا تخضع لابتزاز العقوبات.
وده يفسر حاجات كتير حصلت الفترة اللي فاتت زي سماح امريكا بتصدير بعض شرائح الذكاء الاصطناعي ومحاولات فتح قنوات تفاوض اقتصادية لانهم ببساطة فهموا ان الصين قربت توصل للاكتفاء الذاتي.
العالم بيتغير بسرعة والصراع الجاي شكله هيبقى مختلف والصين واضح انها قررت تكسر كل الخطوط الحمراء خطوة خطوة وامريكا عارفة كويس ان الوقت مش في صالحها وكل اللي بيحصل دلوقتي هو سباق مع الزمن قبل ما ميزان القوة يتغير بشكل نهائي.
