هبوط كبير في أسعار الفراخ.. السر في التقرير ده

الاسعار بتقل والناس مقلقة.. خلال الأيام اللي فاتت أسعار الفراخ في السوق بتسجل هبوط يوم ورا التاني. 

الفراخ في المزارع وصلت 56 جنيه للكيلو وده أقل مستوى ليها من حوالي 9 شهور وناس كتير بدات تقلق من الموضوع وتسأل ايه السبب.

لكن خليني اقولك إن ببساطة يا سيدي اللي بيحصل ده بسبب اكتر من حاجة فمثلا سوق الأعلاف بقى فيه استقرار نسبي في الفترة الأخيرة مع توافر الخامات بشكل أفضل.. ده غير كمان ان بقى فيه توازن واضح بين العرض والطلب وده خلا الأسعار تهدى وتنزل بالشكل ده.

 وده انعكس مباشرة على الأسواق وحركة البيع زادت خصوصا خلال أيام الجمعة والسبت .

الفراخ البيضاء بقت بتتباع للمستهلك ما بين 65 لحد 72 جنيه حسب المنطقة وتكلفة النقل .. والفراخ الساسو كمان نزلت وسجلت في المزارع حوالي 61 جنيه ووصلت للمستهلك من 66 ل 76 جنيه في المقابل الفراخ البلدي لسه محتفظة بسعرها وبتتباع ما بين 83 ل 100 جنيه بسبب زيادة الطلب عليها 
وبالنسبة لمشتقات الفراخ فهي مستقرة.. البانيه ب 165.. الصدور 150 والأوراك 75 جنيه ومع استقرار أسعار البيض الأحمر والأبيض والبلدي.

الصورة العامة بتأكد إن السوق داخل حالة هدوء نسبي وده مخلي الوقت الحالي فرصة مناسبة للشراء مع متابعة أي تغيير جديد في الأيام الجاية.