7 مليار دولار فقط من الذهب.. خريطة أعلى الصادرات المصرية خلال 11 شهرا من 2025
ليه الذهب بقى رقم واحد في الصادرات المصرية وبفارق كبير عن باقي السلع؟، وهل اعتمادنا الكبير على الذهب مكسب طويل المدى ولا لازم توازن أكتر في خريطة التصدير؟، وإيه اللي خلى صادرات الأسمدة والأسلاك والكابلات تحقق الأرقام دي في 2025؟، وهل الصناعات الهندسية بقت فعليًا بديل حقيقي للصادرات التقليدية؟، والصادرات الزراعية زي البرتقال والفاكهة.. هل مصر مستغلة إمكانياتها بالكامل ولا لسه في فرص أكبر؟
خليك معايا كده، لأن أرقام الصادرات المصرية خلال أول 11 شهر من سنة 2025 بتكشف صورة مهمة جدًا عن شكل الاقتصاد المصري، وإحنا بنصدر إيه وبنجيب عملة صعبة منين، وإزاي خريطة التصدير بتتغير سنة ورا سنة.
أول مفاجأة معانا، أن الذهب تصدر المشهد بالكامل، وبقى أعلى سلعة مصر صدرتها خلال الفترة من يناير لحد نوفمبر 2025، بقيمة تخطت 7 مليار دولار، تحديدًا حوالي 7.065 مليار دولار، رقم ضخم، وبيأكد أن الذهب بقى واحد من أهم مصادر دخول النقد الأجنبي للبلد، ورافد أساسي للصادرات السلعية، خصوصًا مع الطلب العالمي العالي وتقلبات الاقتصاد العالمي.
بعد الذهب، نيجي للمركز التاني، واللي شغلاه الأسمدة النيتروجينية، بصادرات وصلت لحوالي 1.85 مليار دولار. الرقم ده بيعكس حاجتين مهمين، أولهم أن المصانع شغالة بمعدلات مستقرة، وتاني حاجة أن في طلب خارجي قوي على الأسمدة المصرية، خاصة في الأسواق اللي عندها أزمات في الغذاء والزراعة.
المركز التالت كان من نصيب الأسلاك والكابلات المعزولة، بصادرات وصلت لـ 1.643 مليار دولار، وده مؤشر واضح إن الصناعات الهندسية والكهربائية في مصر بدأت تاخد مكان أكبر في خريطة التصدير، ومبقاش التصدير مقتصر على مواد خام أو منتجات تقليدية بس.
نخش على المركز الرابع، ونلاقي المواد الناتجة عن زيت النفط أو الزيوت الخام، واللي حققت صادرات بحوالي 1.396 مليار دولار، ودي بتأكد أن المنتجات البترولية لسه ليها وزن مهم في الصادرات، حتى مع اتجاه الدولة لتنويع الاقتصاد.
أما المركز الخامس، فكان من نصيب الحمضيات وعلى رأسها البرتقال، بصادرات وصلت لـ884 مليون دولار، وده استمرار لتفوق الصادرات الزراعية المصرية، خصوصًا في أوروبا وروسيا ودول الخليج، واللي بقت تعتمد على البرتقال المصري كمنتج أساسي.
نيجي بقى للصناعات التحويلية، ونلاقي أن الملابس الجاهزة حققت صادرات بحوالي 838 مليون دولار، وده رقم مهم جدًا، لأن القطاع ده بيوفر فرص عمل كبيرة، وبيعتمد على قيمة مضافة أعلى.. بعدها مباشرة، الأسمنت، بصادرات وصلت لـ806 ملايين دولار، مستفيد من الطلب الكبير في الأسواق الإفريقية والعربية، خاصة مع مشروعات الإعمار والبنية التحتية.
كمان عندنا الأسلاك من النحاس النقي، واللي حققت صادرات بـ 729 مليون دولار، ودي سلعة صناعية تقيلة وبتدخل في صناعات كتير، وده دليل تاني على تنوع الصادرات.. ومعانا كمان الفواكه والأثمار القشرية بصادرات قريبة من 728 مليون دولار، وأخيرًا شاشات المونيتور اللي دخلت قائمة العشرة الكبار بصادرات وصلت لـ 703 ملايين دولار.
يعني من الآخر، أن خريطة الصادرات المصرية خلال 2025 بتقول إن مصر مش بس بتصدر، لكن بتنوع بين تعدين وزراعة وصناعة وطاقة، ومع زيادة واضحة في السلع ذات القيمة المضافة، وده بيدعم هدف الدولة في زيادة الصادرات، وتوفير عملة صعبة، وبناء اقتصاد أقوى وأكثر استدامة في الفترة اللي جاية.
