قصة أكبر مزرعة نخل بالعالم في مصر.. تضم 2 مليون و300 ألف نخلة
بتضم 2 مليون و300 ألف نخلة.. هتبقى اكبر واضخم مزرعة في العالم.. وهتدخل لمصر مليارات الدولارات وهتحولها لأكبر دولة مصدر في العالم.
مشروع جديد هيقلب كل الموازين.. هيوفر فرص عمل للشباب وهيصدر تمور بـ200 مليون دولار بالقليل اوي.. يا ترى إيه حكاية المشروع ده وإنتاج مصر كان بيروح فين قبل كدا.. ايه الحكاية؟
مشروع لوحده قادر يغير شكل اقتصاد كامل.. كلنا عارفين إن مصر هي الدولة الأكبر في انتاج التمور في العالم.. لكن رغم كدا صادراتنا لحد دلوقتي ما بتعدّيش 4 ونص في المية من إجمالي الإنتاج يعني الكنز موجود بس ماحدش عارف يستغله صح.
عشان كده الدولة قررت تدخل اللعبة على تقيل.. مشروع أكبر مزرعة نخيل في العالم.. مش في المنطقة ولا في أفريقيا في العالم كله.. المكان هيكون توشكى جنوب مصر.. والحجم 2 مليون و300 ألف نخلة.. رقم يخض اي حد.
المشروع مش لسه بيخطكوا ليه ولا لسة جديد.. ده بدأ من 7 سنين والنهارده تم إنجاز حوالي 75% منه.. يعني اتزرع بالفعل مليون و700 ألف نخلة والباقي هيتزرع خلال سنتين
طيب ده هيعمل إيه وهيفيدنا ازاي.
خلينا نمسك الأرقام واحدة واحدة.. أولا مصر بتسيطر على حوالي خُمس إنتاج التمور في العالم .. وربع الإنتاج العربي ومع كده العائد مش على قد الحجم.. وهنا بقى يجب التحول.. وزارة الزراعة مستهدفة من تصدير تمور المجدول بس عائد يوصل ل 200 مليون دولار ودي مرحلة أولى مش سقف.
أكتر من تلت مساحة المزرعة مزروعة مجدول و800 ألف نخلة تانية من أصناف مختلفة ممكن تنتج لحد 80 ألف طن تمور غير 100 ألف نخلة لسه ما دخلتش مرحلة الإنتاج يعني اللي جاي أكتر بكتير من اللي ظاهر.
السنة اللي فاتت صادرات مصر من التمور وصلت 88 ألف طن بقيمة 108 مليون دولار تخيل بقى لما مشروع بالحجم ده يشتغل بكامل طاقته هنا بنتكلم مش ملايين ده طريق مفتوح لمليارات الدولارات.
والقصة ما وقفتش لحظ هنا .. المزرعة دي لوحدها متوقع تنتج 13 مليون فسيلة نخل.. وال13 مليون دول يا إما يبنوا مزرعة أكبر من توشكى يا إما يتصدروا لبرة ويدخلوا عملة صعبة يا إما الاتنين مع بعض.
مصر النهارده عندها 24 مليون نخلة وإنتاجها السنوي وصل لمليوني طن تمور بزيادة 11% الأرقام كلها بتقول إننا مش بس بنزرع إحنا بنعيد رسم خريطة اقتصاد زراعي كامل.
ده مشروع مش هدفه تمور وبس.. ده مشروع تشغيل.. تصدير.. تصنيع.. عملة صعبة.. واستغلال حقيقي لإنتاج ضخم كان مهدر.. مشروع هيحول ميزة طبيعية لقوة اقتصادية.. و لو اتدار صح هيبقى واحد من أهم مصادر الدخل لمصر في السنين الجاية.
