قفزة جديدة للذهب.. اتفاقيات مهمة مع كندا.. وزيارة مهمة لبعثة البنك الدولي
قفزة جديدة للذهب.. اتفاقيات مهمة مع كندا.. وزيارة مهمة لبعثة البنك الدولي.. ينشر بانكير حصاد 24 ساعة الإخباري.
والبداية من سوق الصاغة أسعار الدهب رجعت تطلع من تاني خلال تعاملات النهارده في السوق المحلي متأثرة بالعوامل العالمية والمحلية ومع حركة شراء متوسطة من المستهلكين.
بالنسبة لأسعار الدهب المحلية عيار 24 سجل حوالي 6577.25 جنيه للجرام وده أعلى عيار من حيث الجودة عشان نسبة الدهب الخالص فيه كبيرة وعلشان كده بيبقى الاختيار المفضل للمستثمرين اللي عايزين يشتروا دهب خام ورغم جودته العالية الإقبال عليه بيبقى أقل شوية بسبب سعره المرتفع مقارنة بباقي الأعيرة وده بيخلي ناس كتير تفضل عيارات أقل زي 21 و18.
أما عيار 21 فوصل لحوالي 5755 جنيه للجرام وده أكتر عيار منتشر ومحبوب عند المصريين لأنه مرتبط بعادات الادخار والجواز وكمان بيعتبر المؤشر الرئيسي لحركة سوق الدهب كتير من الأسر بتعتمد عليه سواء في الادخار أو في شراء شبكة الجواز وده اللي مخليه دايمًا أكتر الأعيرة استقرار من ناحية الطلب.
عيار 18 سجل حوالي 49325.75 جنيه للجرام وبيتميز إنه أقل تكلفة من الأعيرة الأعلى وكمان تصميماته الحديثة والعصرية بتجذب فئة الشباب بشكل أكبر وبيعتبر اختيار مناسب للي عايز يشتري قطع دهب شيك وحديثة من غير ما يدفع أسعار عالية زي عيار 21 أو 24.
أما عيار 14 فوصل سعره لحوالي 3836.75 جنيه للجرام وده بيبقى اختيار اقتصادي للناس اللي عايزة تقتني دهب بسعر أقل مع الحفاظ على قيمته الأساسية وغالبًا بيفضله اللي بيدور على التوفير أو اللي عايز يجيب هدية دهب بسعر معقول.
ونروح للدكتورة رانيا المشاط وزيرة التخطيط والتنمية الاقتصادية والتعاون الدولي اللي وقعت مع السفير أولريك شانون سفير كندا لدى مصر اتفاقيات تلات مشروعات جديدة بين الحكومتين المصرية والكندية بقيمة حوالي 552 مليون جنيه.
وفي تعليقها على الاتفاقيات دي أشادت الدكتورة رانيا المشاط بقوة العلاقات المصرية الكندية والمصالح المشتركة اللي بتجمع البلدين في مجالات كتير وأكدت تقديرها للدعم الكندي لمصر في ملفات التنمية المختلفة وقالت إن المشروعات دي بتمثل إضافة مهمة للجهود الوطنية في مجال التنمية المستدامة ووضحت إن الاتفاقيات دي بتيجي في إطار التكامل بين التخطيط والتعاون الدولي لدعم التنمية الشاملة في مصر.
وكمان أشارت للمحفظة الحالية للتعاون الكندي في مصر وقالت إن إجمالي التمويل الجاري قبل توقيع المشروعات الجديدة كان حوالي 40 مليون دولار كندي بما يعادل 1.4 مليار جنيه وده موجه لمشروعات شغالة في مجالات دعم المرأة والاقتصاد والصحة والتعليم والزراعة الذكية مناخيًا وأضافت إن المشروعات دي بتغطي مناطق كتير في مصر من الصعيد زي أسيوط والمنيا لحد الوجه البحري زي البحيرة والغربية والمنوفية وكمان المدن الكبرى زي القاهرة والجيزة والإسكندرية ودمياط.
ونروح للمهندس محمد شيمي وزير قطاع الأعمال العام اللي استقبل وفد رفيع المستوى من مجموعة البنك الدولي وضم الوفد شيخ عمر سيلا المدير الإقليمي لمؤسسة التمويل الدولية لمنطقة شمال أفريقيا والقرن الأفريقي وستيفان جيمبرت المدير الإقليمي بالبنك الدولي لمصر واليمن وجيبوتي وسعد صبره مدير مؤسسة التمويل الدولية في مصر.
وأكد المهندس محمد شيمي إن الوزارة بتتطلع لتعزيز وزيادة مجالات التعاون مع مجموعة البنك الدولي في الفترة الجاية وده في إطار دعم خطط الدولة للإصلاح الهيكلي وتطوير الشركات التابعة وتحسين كفاءتها التشغيلية والمالية وتحقيق الاستدامة وتعظيم الاستفادة من أصول الدولة وتعزيز مبادئ الحوكمة.
واللقاء كمان تناول عرض عدد من الفرص الاستثمارية المهمة في القطاعات التابعة للوزارة زي قطاع الغزل والنسيج وقطاع السياحة والفنادق بالإضافة لدور الوزارة في برنامج الطروحات الحكومية اللي بيساهم في جذب استثمارات جديدة وتعزيز دور القطاع الخاص في الاقتصاد الوطني.
