أرخص من الحديد 40% ولا بيصدي وغير موصل للكهرباء.. الحديد الفايبر اختيار جيد لو هتبني بيتك

نفسك تبني شقة ولا حتى عمارة وشايل هم ارتفاع الأسعار يبقى مفيش قدامك غير الحديد الفايبر، ده ارخص من الحديد العادي ب40% انت متخيل .. بس ايه مميزات النوع ده من الحديد وليه احسن من الحديد العادي.

أسعار مواد البناء بقالها سنين طويلة وهي طالعة طالعـة مرعبة، وكل سنة عن اللي قبلها، لحد ما وصلنا لمرحلة إن أي حد يفكر يبني أو يشتري شقة يحس إن الموضوع شبه مستحيل، وده طبيعي لأن الزيادة الكبيرة في أسعار الحديد والأسمنت خلت سوق العقارات يولع، والأسعار تزيد حوالي 300% في تلات سنين بس، وده رقم يخلي أي حد يقف يفكر ألف مرة قبل ما يدخل في مشروع بناء.

وعشان كده ناس كتير بدأت تشغل دماغها وتدور على حلول وبدائل، لأن مفيش حد يقدر يكمل بنفس النظام والأسعار دي، ومن هنا بدأت التجارب والبحث لحد ما اكتشفوا إن فيه بديل للحديد التقليدي، وبديل مش أي كلام، ده أقوى منه كمان وأرخص، والبديل ده اسمه حديد الفايبر أو الفايبر جلاس، واللي المفاجأة إنه أقوى من الحديد المسلح بحوالي 3 مرات على الأقل، ورغم قوته الكبيرة دي إلا إن سعره أقل من الحديد بنسبة بتوصل لـ30% و40%، يعني إحنا بنتكلم عن حل اقتصادي حقيقي مش مجرد كلام.

الأسياخ دي بتتصنع من مواد صناعية خاصة، وفي دول كتير زي روسيا بيستخدموها بقالهم سنين في البناء، وانتشارها هناك كان بسبب مميزاتها الكتير، أولها إنها أخف من الحديد العادي بحوالي 9 مرات، وده بيفرق جدًا في النقل والتركيب والتكلفة، غير كده هي مش بتصدي نهائي، يعني مفيش مشاكل صدأ أو تآكل مع الوقت، وكمان مش ناقلة للكهربا، ودي ميزة أمان كبيرة جدًا خصوصًا في المباني السكنية والصناعية.

بس متفتكرش إن عشانها فايبر تبقى استخداماتها محدودة، بالعكس، دي بتدخل في كل حاجة تقريبًا، من الأسقف والأعمدة والمسطحات الكبيرة لحد الموانئ والمراسي والمنشآت الضخمة، والناس في الحقيقة كانت بتستخدم الأسياخ دي من زمان في صناعات كتير غير البناء، لكن لما أسعار الحديد ولعت، بدأوا يدخلوا الفايبر جلاس في مواد البناء، وأثبت نجاح كبير جدًا.

وبعيد عن البناء كمان، الحديد الفايبر ليه مميزات تانية مهمة، أولها إنه صديق للبيئة، يعني ممكن يتعاد تدويره ويتصلح ويتصنع من جديد، وكمان بيتحمل العوامل الخارجية القاسية زي الرطوبة العالية والحرارة الشديدة، وعنده قدرة عالية على مقاومة الحريق وتسربات المياه، وكمان بيعزل الحرارة والصوت والكهربا، وفوق كل ده عمره الافتراضي أطول من الحديد العادي بحوالي 4 مرات، وده معناه إن المباني اللي بتستخدمه تعيش أطول وبتكلفة صيانة أقل.

وعشان كده أحمد الزيني رئيس الشعبة العامة لمواد البناء قال إن لازم نهتم بصناعة الحديد الفايبر في مصر، ولازم الدولة تشجع تصنيعه محليًا، لأنه هيخلق منافسة حقيقية لحديد التسليح، والمنافسة دي هتجبر المصانع تقلل هامش الربح، وده في الآخر هيخفض الأسعار، خصوصًا إن الحديد الفايبر يعتبر بديل مباشر لحديد التسليح وسعره أقل بنسبة كبيرة، وكمان استخدامه على نطاق واسع هيساهم في خفض أسعار المباني والوحدات السكنية، والدولة نفسها ممكن تعتمد عليه في المشروعات القومية والمشروعات الكبيرة عشان تضغط التكلفة.

ومن أهم مميزاته كمان إنه بيتصنع حسب الاحتياج، يعني ممكن يتعمل بمقاسات ومواصفات خاصة لكل مبنى حسب طبيعته، على عكس حديد التسليح اللي بيكون مقاساته ثابتة، والفرق الأساسي إن حديد التسليح بيتصنع من الصلب، إنما الحديد الفايبر بيتصنع من مواد صناعية بتتحدد حسب الاستخدام، وعشان كده بدأنا نشوف بعض المصانع المصرية بالفعل بتدخل معدات وأدوات جديدة عشان تبدأ تصنيع النوع ده.

وده معناه إننا في الفترة الجاية ممكن نشوف الحديد الفايبر منتشر في السوق، ويمكن كمان يبقى هو الأساس بدل الحديد العادي، خصوصًا لو أثبت نفسه أكتر في السوق المصري.