السوق في النازل وده ميعاد ارتفاع الأسعار.. ايه أنسب وقت تشتري فيه شقة؟

لو فاكر إن أسعار العقارات في مصر هتفضل تطلع بالسعر المجنون اللي شفناه في 2023 و2024، يبقى الخبر ده ليك 
الحقيقة أن الواقع بيقول إن السوق دخل مرحلة جديدة أهدى، وأقرب للمنطق، بعد موجات ارتفاع متسارعة، السوق العقاري في 2025 بدأ يشهد تباطؤ واضح في وتيرة زيادة الأسعار، مع زيادة المعروض، وتراجع القدرة الشرائية، وانخفاض الطلب نسبيًا..

لكن ده مش معناه ضعف السوق، بالعكس، اللي بيحصل هو إعادة تسعير طبيعية بتقرب السعر من القيمة الحقيقية للعقار.

وزير الإسكان أكد إن الأسعار حاليًا في حالة ثبات واضح، ونفى تمامًا وجود فقاعة عقارية، موضح إن العقار في مصر ما زال ملاذ آمن، والطلب الحقيقي موجود، خصوصًا مع تسهيلات سداد وصلت ل15 سنة بتخفف الضغط على المشترين.

خبراء السوق كمان أكدوا إن زيادات 2025 ما قارنتش باللي حصل قبلها، فبعد ما كانت الزيادات بتوصل لـ 60 و70%، بقت دلوقتي في حدود 15 لـ 20% سنويًا، ودي نسبة طبيعية تتماشى مع التضخم وتكلفة البناء. ومع تراجع الطلب والفائدة العالية، المطورين مش هينزلوا الأسعار، لكن ممكن نشوف تصحيح بسيط مش أكتر.