"شهادة ميلاد العقار" بعد التصالح.. خطوة جديدة بتغير سوق العقارات في مصر

بعد تطبيق قانون التصالح في مخالفات البناء، ظهر مصطلح جديد اسمه "شهادة ميلاد العقار".

طيب هي إيه الحكاية؟
باختصار.. لو عندك عقار مخالف وقدمت للتصالح واتقبل ملفك، الدولة بتطلعلك وثيقة رسمية بتقول إن عقارك بقى قانوني 100%.. ودي اللي بنسميها شهادة ميلاد العقار.

الشهادة دي معناها إن العقار بقى جاهز يتسجل في الشهر العقاري، وتقدر تبيع، تأجر، أو تتصرف فيه براحتك وكل ده بشكل رسمي ومعتمد.

ولما تيجي تسجل في الشهر العقاري، التسجيل نفسه بياخد حوالي 37 يوم بشرط تكون كل أوراقك جاهزة.. زي العقد، الرفع المساحي، شهادات العقار، إيصالات المرافق، والبطاقة.

في ناس بتسأل: هو لازم محامي؟ مش شرط.. بس وجوده بيسهل عليك إجراءات كتير وبيمنع أي غلط أو تلاعب.
وبرضه ناس بتسأل: دعوى صحة توقيع تغني عن التسجيل؟ الإجابة: لأ.

دعوى صحة التوقيع بتثبت إن التوقيع صحيح لكن ما بتنقلش الملكية.. الملكية مابتتنقلش غير بالتسجيل بس.

أما عن الرسوم؟ البائع بيدفع ضريبة التصرفات العقارية، والمشتري عليه باقي رسوم التسجيل.

يعني نقدر نقول ان التسجيل في الشهر العقاري هو الضمان الوحيد اللي بيحمي ملكيتك ويمنع أي حد ينازعك أو يبيع نفس العقار مرتين.

يعني لو عقارك أخد شهادة الميلاد؟
انت كده سندك القانوني كامل وعقارك بقى "مولود رسميًا" في الدولة.