استنى متشرتيش.. تراجع كبير في أسعار العقارات خلال هذا التوقيت

في 2025 السوق العقاري ابتدى يبان عليه الارهاق بسبب الاسعار المبالغ فيها.. وناس كتير بطلت تشتري والمبيعات بقت بطيئة بشكل واضح.

والمطورين بقوا يعتمدوا على القروض والتوريق علشان يقدروا يكملوا.. لكن الحقيقة ان 2026 هي السنة اللي المفروض نشوف فيها التصحيح الحقيقي.. لان المعروض هيزيد بشكل كبير قدام طلب ضعيف وده هيعمل ضغط مباشر على الاسعار.

ومشروعات كتير هتضطر تعمل خصومات مش علشان التسويق لكن علشان تحافظ على السيولة وتقدر تستمر، ومطورين كتير باعوا على اقساط طويلة هيواجهوا مشكلة حقيقية في التدفقات النقدية.. ده وكمان فيه شركات صغيرة او متوسطة ممكن تخرج من السوق.

اللي حصل في سوق العربيات مش بعيد خالص عن اللي هيحصل في العقارات لان في 2023 و2024 اسعار العربيات كانت طالعة بشكل مبالغ فيه ومحدش كان متخيل انها ممكن تنزل.. بس مع زيادة المعروض وتحسن الاستيراد الاسعار ابتدت تنزل واحدة واحدة.. ولسه بتنزل لحد دلوقتي علشان كانت اعلى من قدرة الناس على الشراء.

العقار مش بيقع مرة واحدة لكنه بيتراجع لما المعروض يزيد والقدرة الشرائية تضعف وده اللي حاصل دلوقتي بسبب سحب السيولة من السوق.