مرتبات 50 ألف جنيه.. وظائف جديدة في السفارة الأمريكية.. مواعيد التقديم

لو بتدور على فرصة شغل محترمة بمرتب عالي.. السفارة الأمريكية في القاهرة أعلنت عن وظائف جديدة بمرتب يوصل لـ 50 ألف جنيه شهريًا.. والتقديم شغال لحد 17 ديسمبر.. طيب إيه تفاصيل الشغل؟ الوظائف في مجال الأمن الفني.

والمهام بتشمل التفتيش، تركيب وصيانة معدات الأمن. وكمان التعامل مع أعطال الطوارئ، ودراسة أنظمة الأمن وتطويرها داخل مكتب الأمن الهندسي في القاهرة.

طب إيه الشروط؟ أول حاجة.. لازم تصريح طبي وتصريح أمني، وكمان فحص خلفية قبل التعيين.. ويفضل تكون قادر تبدأ الشغل أول ما التصاريح تطلع.

من ناحية المؤهل. لازم ثانوية عامة + سنتين تدريب مهني أو فني في مجالات زي الكهرباء أو الميكانيكا… وفيه تقييم شامل حسب الخبرة، اللغة، المهارات.

وممكن يطلبوا اختبار لغة قبل التعيين. والتقديم سهل.. هتدخل على موقع السفارة الأمريكية، تفتح صفحة الوظائف، وتملى استمارة التقديم وتحمل المستندات المطلوبة.. بس لو ناقص ورقة واحدة.. الطلب هيتشال فورًا.. لو شايف نفسك مؤهل وعايز شغل براتب قوي الفرصة دي فعلاً تستاهل.