بطارية عربيتك بتبوظ في الشتاء؟.. 3 حاجات لازم تعرفها

كل يوم الصبح في الشتا، بتدور العربية مبتدورش؟ المشكلة 90% بتكون في البطارية اللي البرد بيضعفها. 

طب تعمل إيه؟

أولاً، اختبار النور، بالليل والعربية مبطلة، شغل النور الواطي قدام حيطة.

لو النور ضعف بسرعة أوي، يبقى بطاريتك بتودع ومحتاجة تتغير.

ثانياً، لو عطلت خلاص، لما تاخد وصلة من عربية تانية، فيه ترتيب مهم عشان متعملش مشكلة كبيرة، الكابل الأحمر على الموجب في العربيتين،  الكابل الأسود على السالب في العربية السليمة، والناحية التانية على أي حتة حديد في موتور عربيتك العطلانة، مش على السالب بتاعك.

ثالثاً، بعد ما تدور، متطفيش العربية علطول، لازم تمشي بيها مشوار عشان البطارية تلحق تشحن تاني، لو عطلت منك تاني يوم، يبقى لازم تتغير فوراً.