قرار هام للمركزي.. طرح جديد بالدولار.. و300 جنيه ارتفاعا في الذهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قرار هام للمركزي، وطرح جديد بالدولار، و300 جنيه ارتفاعا في الدهب.
نبدأ من البنك المركزي المصري، اللي أصدر منشور دوري موجّه لرؤسا مجالس إدارات البنوك، بيعلن فيه إن مجلس إدارة البنك المركزي في جلسته يوم 23 نوفمبر 2025 وافق على تعديل جديد في تعليمات الحوكمة والرقابة الداخلية اللي بتنظم شغل البنوك، وده في إطار رفع كفاءة بيئة الحوكمة وتطوير إطار إدارة المجالس.
البنك المركزي أوضح إن التعديل شمل بندين من تعليمات الحوكمة، وتم تحديث الضوابط الخاصة بانعقاد اجتماعات مجالس الإدارات وطريقة التصويت وصلاحيات الأعضاء.
وبحسب المنشور، التعديل الأول نصّ على إن اجتماعات مجالس الإدارات لازم تكون منتظمة وما تقلش عن 6 مرات في السنة، والحضور الفعلي ما يقلش عن 4 مرات، مع إمكانية الدعوة لاجتماع طارئ لو طلب رئيس المجلس أو أغلب الأعضاء، بشرط إرسال جدول الأعمال قبلها وإتاحة كل المواد المطلوبة عشان الأعضاء يشاركوا بشكل فعّال، حتى لو كانوا غير متفرغين.
وأكد البنك المركزي إنه لو في عضو مش قادر يحضر، ممكن يشارك بالفيديو أو التليفون بعد ما يبلغ رئيس المجلس وأمين السر، مع ضرورة إن أغلبية الأعضاء يكونوا حاضرين فعليًا.
ونبّه المركزي كل البنوك بضرورة الالتزام الكامل بالتعليمات الجديدة وتنفيذها فورًا، عشان يعزز مستوى الحوكمة ويحافظ على سلامة الإطار الرقابي جوه القطاع المصرفي.
ولسه مكملين مع البنك المركزي المصري… اللي هيطرح بكرة، أذون خزانة مقومة بالدولار لمدة سنة، بقيمة إجمالية 950 مليون دولار، ضمن برنامجه المستمر لإصدار أدوات الدين الحكومية بالعملة الأجنبية، حسب رويترز.
ووضح المركزي إن الأذون دي بتيجي في إطار تنويع أدوات التمويل وتوسيع قاعدة المستثمرين الدوليين، وده بيساعد في خفض تكلفة التمويل وتحسين مؤشرات الدين الخارجي، مع الحفاظ على استدامة إدارة المديونية.
والخطوة دي تعتبر جزء من جهود مصر لجذب استثمارات أجنبية أكتر وتعزيز السيولة الدولارية في السوق، وده بيدعم احتياجات الحكومة من التمويل وبيوفر للمستثمرين أدوات دين آمنة بعائد ثابت بالدولار.
وكمان طرح البنك المركزي المصري النهارده، أذون خزانة محلية نيابة عن وزارة المالية، بقيمة إجمالية 65 مليار جنيه، بهدف توفير السيولة اللازمة لتغطية عجز الموازنة وسداد الديون قصيرة الأجل.
ونروح بقى لسوق الصاغة… أسعار الذهب زادت في السوق المحلي بنسبة 5.6% خلال تعاملات شهر نوفمبر، في الوقت اللي ارتفعت فيه الأوقية عالميًا بنسبة 5.3%، وسط توقعات إن الفيدرالي الأمريكي يخفض الفايدة الشهر الجاي، وده حسب تقرير منصة «آي صاغة».
وقال سعيد إمبابي، المدير التنفيذي لـ«آي صاغة»، إن أسعار الذهب في السوق المحلي زادت خلال نوفمبر بنسبة 5.6%، يعني حوالي 300 جنيه، وكان جرام عيار 21 فاتح الشهر على 5350 جنيه وقفل على 5650 جنيه.
وفي المقابل، الأوقية عالميًا زادت 5.3% بقيمة 213 دولار، وبدأت الشهر على 4003 دولار وقفلت على 4216 دولار.
وأشار إمبابي إلى إن أسعار الذهب محليًا زادت حوالي 200 جنيه خلال الأسبوع اللي فات، وجرام عيار 21 بدأ الأسبوع عند 5450 جنيه وقفل عند 5650 جنيه، بينما الأوقية عالميًا زادت حوالي 151 دولار، من 4065 لـ4216 دولار.
وسجّل عيار 24 حوالي 6457 جنيه، وعيار 18 حوالي 4843 جنيه، بينما الجنيه الذهب فضل ثابت عند 45200 جنيه.
ونختم خبرنا من المتحف المصري الكبير… اللي أعلن إنه هيعتمد بالكامل على الحجز الإلكتروني لتذاكر الزيارة بدايةً من بكرة، من خلال الموقع الرسمي للمتحف، وهيتم وقف بيع التذاكر جوه المتحف لحد إشعار آخر، وده بهدف تنظيم الدخول وتقليل الزحمة مع زيادة الإقبال.
والقرار ده بييجي بالتزامن مع تطبيق نظام جديد لتقسيم أوقات الزيارة لـ5 فترات يوميًا، من 8:30 الصبح لحد نهاية مواعيد الزيارة. الفترة الأولى من 8:30 لـ11 صباحًا، التانية من 11 لـ1 ظهرًا، التالتة من 1 لـ3 عصرًا، الرابعة من 3 لـ5 مساءً، والخامسة من 5 مساءً لحد نهاية وقت الزيارة.
