إيطاليا تعشق المنتج المصري.. روما تتصدر قائمة الدول الأكثر استيرادا من مصر
في الوقت اللي العالم كله بيعاني من تغيرات اقتصادية وتقلبات في حركة التجارة، مصر قدرت تزود صادراتها لدول مجموعة العشرين وتفتح لنفسها مكان كبير على خريطة التجارة العالمية، واللافت للنظر إن إيطاليا بقت أكتر دولة بتحب وتستورد المنتج المصري خلال سنة 2025.. لدرجة إنها لوحدها اشترت بخمسة مليار تقريبًا في السنين اللي فاتت، و3 مليار في أول تسعة شهور بس من السنة! النهاردة هنعرف ليه إيطاليا بتستورد من مصر بالشكل ده، وإيه أهم السلع اللي العالم كله بقى طالبها من عندنا.
خلال الشهور التسعة الأولى من سنة 2025، حصل تغير واضح في حركة التجارة بين مصر ودول مجموعة العشرين، الأرقام بتقول إن الصادرات المصرية زادت بشكل كويس، ووصلت لـ15.7 مليار دولار، مقارنة بـ14.2 مليار في نفس الفترة من 2024.. يعني تقريبًا زيادة 10.6%. وده مش رقم صغير، خصوصًا إن معظم الدول الكبيرة في العالم بتعاني من تباطؤ اقتصادي.
لكن المفاجأة الحقيقية كانت في إيطاليا.. الدولة اللي قررت تبقى رقم واحد في استيراد السلع المصرية، تخيل إن لوحدها مستوردة بـ3 مليارات دولار من مصر! وده معناه إن في علاقة تجارية قوية جدًا بين البلدين، وإن السوق الإيطالي شايف قيمة وجودة في المنتجات المصرية.
بعد إيطاليا، بييجي دور تركيا والسعودية والولايات المتحدة وبريطانيا.. وكلها دول عندها طلب عالي على المنتجات المصرية، وكل واحدة منها داخلها مليارات، وده معناه إن مصر بقت ليها وجود ثابت وسط كبار العالم.
طب إيه هي السلع اللي مصر بقت مميزة فيها؟ أغلب الصادرات اللي طلعت لحد سبتمبر 2025 كانت حاجات مطلوبة عالميًا، على رأسها الخضار والفاكهة اللي وصلت قيمتها لـ2 مليار دولار، ودي واحدة من السلع اللي مصر بقت تنافس بيها فعلاً، خصوصًا إن عندها مواسم إنتاج مش موجودة في أوروبا.
كمان الملابس الجاهزة حققت 1.9 مليار دولار.. ودي سلعة مصر بتصدر فيها من زمان، لكنها لسه بتحافظ على مكانها، غير كده عندك الوقود والزيوت المعدنية بـ1.7 مليار دولار، واللي بيمثل جزء مهم من صادرات مصر، الأسمدة والحديد والصلب كمان موجودين بقوة، وده بيدل إن مصر مش بس بتصدر منتجات زراعية، لكنها كمان بتصدر صناعات وتقيلة ومهمة.
في المقابل، واردات مصر من دول مجموعة العشرين زادت برضه مصر اشترت بـ54.7 مليار دولار من الدول دي، مقارنة بـ47.5 مليار سنة اللي قبلها.. يعني زيادة 15.2%، وده طبيعي لأن مصر لسه معتمدة على استيراد جزء كبير من احتياجاتها.
الصين كانت رقم واحد في تصدير السلع لمصر بـ13.9 مليار دولار وبعدها أمريكا والسعودية وروسيا وألمانيا والبرازيل والهند.. يعني كل الدول الكبيرة اللي مصر بتتعامل معاها تجاريًا.
والأرقام دي كلها بتقول إن العلاقة التجارية بين مصر ودول العالم بقت أوسع وأكبر، في طلب عالمي متزايد على السلع المصرية، وفي نفس الوقت مصر بتعتمد على واردات من أكبر اقتصاديات العالم.
يعني باختصار المنتج المصري بقى مطلوب، والدولة بقت موجودة في أسواق كتير، وإيطاليا تحديدًا شكلها مش هتبطل تشتري من مصر قريب.
