استثمار بـ5 مليارات دولار.. ايه اللي بيحصل في أرض الحزب الوطني.. وسر تنافس 11 تحالف محلي وعالمي عليه
على مساحة 16 الف ونص متر مكعب.. فيه قصة كبيرة بتتحصل دلوقتي في قلب القاهرة… أرض الحزب الوطني في ميدان التحرير اللي كان عليها جدل كبير خلال السنين اللي فاتت.
دلوقتي العين بقت عليها وفيه 11 تحالف استثماري من مصر والوطن العربي عاوزين يضخوا فيها استثمارات توصل لـ5 مليار دولار.. ويحولها لمشروع ضخم.. يا ترى إيه الحكاية وليه الأرض ديه بالذات عليها جدل كبير .. تعالوا نعرف ايه الحكاية.
الحكومة دلوقتي بتجهيز لمشروع تاريخي من خلال صندوق مصر السيادي واللي اتستقبل عروض من 11 تحالف استثماري لتطوير أرض الحزب الوطني المنحل في ميدان التحرير .
والمفاجأة بجد أن التحالفات ديه بتتنافس فيها شركات محلية وإقليمية وفي شركات قدمت على المشروع قبل كده.. لكن القرار النهائي لاختيار التحالف اللي هيفوز هيتم قبل نهاية السنة
طيب اشمعنا الأرض ديه وليه في منافسة قوية عليها من دول عربية.
ببساطة الأرض مساحتها حوالي 16 ونص ألف متر مربع وبتطل على نهر النيل.. يعني بنتكلم على مكان استراتيجي في قلب القاهرة.
وبالمناسبة الأرض دي اتضمت لصندوق مصر السيادي سنة 2020 بعد صراع طويل بين وزارة الآثار ومحافظة القاهرة على تبعيتها.. المبنى القديم اتبنى في الخمسينيات على يد المهندس محمود رياض، اللي كمان صمم مجمع التحرير، اتهد سنة 2014.
الصندوق السيادي اللي اتأسس سنة 2019 عشان يدير أهم أصول الدولة زي الكهرباء والعقارات والبتروكيماويات وهو المسؤول حاليًا عن تطوير الأرض دي.
المشروع دلوقتي مخصص لشركتين تابعتين للصندوق هما نايلوس للخدمات الفندقية والتجارية ونايلوس للخدمات السكنية.. ومخططين انهم يبنوا برجين الأول فندقي وإداري وتجاري بارتفاع 75 دور، والتاني سكني فخم من 50 دور وبيضم 446 وحدة.
المشروع هيشتغل بنظام مشاركة الإيرادات بين الصندوق والتحالف المنفذ، بإجمالي استثمارات حوالي 5 مليار دولار.
من ناحية تانية المشروع ده مش بس هيغير شكل ميدان التحرير والنيل.. لكن كمان هيجذب المستثمرين والسياحة الفاخرة وهيضيف روح جديدة للقلب التاريخي للقاهرة.
