بـ21.1 مليار دولار و140 ألف فرصة عمل.. إنجازات المنطقة الاقتصادية لقناة السويس منذ إنشائها في 2015
إنجازات كبيرة حققتها منطقة قناة السويس من يوم ما اتعملت في 2015، بس إزاي نجحت المنطقة الاقتصادية في جذب أكتر من 11.6 مليار دولار في 3 سنين بس؟ وهل ده معناه إننا داخلين على طفرة أكبر؟، وهل قدرة المنطقة على خلق 140 ألف فرصة عمل كافية لسوق العمل المصري ولا لسه في فجوة محتاجة تتسد؟، وإيه أبرز القطاعات اللي لسه محتاجة توسع داخل المنطقة الاقتصادية؟.
من 2015 لحد النهاردة، منطقة قناة السويس الاقتصادية بقت مثال واضح إن الشغل الصح بيبان، وإن الاستثمار الحقيقي بيغير شكل اقتصاد بلد كاملة.. في 10 سنين بس، المشروع ده قدر يجذب استثمارات وصلت لـ21.1 مليار دولار، رقم ضخم ماحدش يقدر يقلل منه، خصوصًا أن الفلوس دي اتوظفت في الموانئ والمناطق الصناعية والخدمات اللوجستية اللي بتخدم حركة التجارة العالمية.
والأهم من الفلوس؟، أن فيه 140 ألف فرصة عمل اتوفرت بشكل مباشر لناس كتير، وده لوحده كفيل يوريك قد إيه المشروع ده كان خطوة على الطريق الصح.. المنطقة دلوقتي بتستقبل استثمارات من أكتر من 29 دولة، يعني بقت عنوان للثقة، والمستثمر بقى بييجي وهو متطمن إن المكان ده بيكبر وبيتحرك لقدام.
الغريب بقى أن نص الاستثمارات دي تقريبًا حصلت في آخر 3 سنين بس، من 2022 لحد 2025، وتم جذب 11.6 مليار دولار لوحدهم.. الطفرة دي ماجتش صدفة، جت بعد ما الهيئة اشتغلت على دمج الموانئ والمناطق الصناعية في منظومة واحدة أكثر كفاءة، وكمان بدأت تركز على الصناعات الخضراء اللي العالم كله رايح لها.
مش بس كده، الهيئة سجلت خلال السنة المالية 2024-2025 أعلى إيرادات في تاريخها: 11.6 مليار جنيه، وده بفضل توسع خدمات الموانئ وزيادة الشغل في الأنشطة البحرية.. ولو جينا للمشروعات اللي فتحت أبوابها الفترة اللي فاتت، هنلاقي حاجات قوية فعلًا
1- محطة الحاويات SCCT2
بتكلفة 500 مليون دولار، وسعة 2.2 مليون حاوية، وبتوفر 750 فرصة عمل.
2- محطة دحرجة السيارات RORO – SCAT
بتكلفة 159 مليون دولار، وسعة 50 ألف مركبة سنويًا، وبتوفر 400 فرصة عمل.
3- المحطة متعددة الأغراض “SKY”
بتكلفة 65 مليون دولار وسعة 8.5 مليون طن، وبتوفر 550 فرصة عمل.
أما بقى الظهور الحقيقي للمنطقة على الساحة العالمية فكان مع مشروعات الهيدروجين الأخضر، اللي خلتها من أهم مراكز الطاقة الجديدة في المنطقة، مع خطط لإنشاء مصانع وتصدير الوقود الأخضر لأوروبا.
غير إن الهيئة شغالة على مناطق لوجستية جديدة عشان تربط الصناعات بالمواني مباشرة، وده بيوفر وقت، وبيقلل التكلفة، وبيخلي المنتج المصري قادر ينافس أكتر.. يعني باختصار، اللي حصل في منطقة قناة السويس في 10 سنين، دول بيعملوه في 30 والمكسب الحقيقي لسه جاي.
