ليه مصر هتبني مدينة جديدة للسينما؟.. وإيه علاقة ده بالدولار؟
هو إيه حكاية مدينة السينما اللى مصر ناوية تبنيها عند الاهرامات ؟ وليه الحكومة هتبني مدينة جديدة واحنا عندنا مدينة الانتاج الاعلامي؟ وهل مصر ممكن فعلا تدخل عملة صعبة من تصوير الأفلام الأجنبية في مصر؟
الموضوع بدأ لما الحكومة كشفت إنها بتجهز لإنشاء مدينة إعلامية ضخمة في محيط منطقة الأهرامات.. مدينة كاملة فيها استوديوهات مجهزة على أعلى مستوى ونماذج جاهزة لتصوير أفلام عالمية ومشاهد شبه اللي بتتعمل في أمريكا والهند.
مش بس كده المدينة دي هتحتاج فنادق قريبة، خدمات كاملة، وبنية تحتية متحضرة تستقبل فرق الإنتاج اللي بتيجي من برة..يعني إحنا مش بنتكلم عن كام استوديو وخلاص، لأ، إحنا بنتكلم عن صناعة ضخمة كاملة عايزة تتبني من الأول للآخر.
الفكرة كلها جزء من مشروع كبير الحكومة شغالة عليه لتطوير هضبة الأهرام.. التطوير ده الهدف منه مش بس إن السياحة تزيد لكن كمان إن المنطقة تبقى نقطة جذب عالمية للاستثمارات، سواء سياحية أو إعلامية.. وده بيخلينا نفهم إن مدينة السينما الجديدة مشروع اقتصادي ضخم مرتبط برؤية أكبر للدولة.
طب السؤال اللي كل الناس سألته.. ليه نعمل مدينة جديدة وإحنا عندنا مدينة الإنتاج الإعلامي؟
الحقيقة إن مدينة الإنتاج مش ناقصة إمكانيات، لكن المشكلة إن العالم اتغير والصناعة اتغيرت.. النهارده هوليوود وبوليوود وكل الصناعات الضخمة بيدوروا على أماكن جاهزة فيها مواقع تصوير طبيعية، خدمات سريعة، وتصاريح تتعمل في وقت قليل.. وده اللي مصر بتحاول تحققه من خلال قرار جديد وافق عليه مجلس الوزراء.
القرار ده بينظم تصوير الأعمال الأجنبية في مصر.. وبيدي للجنة مصر للأفلام في مدينة الإنتاج مهمة إنها تكون الشباك الوحيد اللي أي شركة أجنبية هتتعامل معاه.. يعني بدل ما المنتج يلف على عشر جهات عشان تصريح تصوير هيقدم طلب من مكان واحد وكل الجهات الحكومية هتبقى مربوطة إلكترونيا باللجنة، والتصاريح تبقى أسرع وأسهل، ودخول المعدات يبقى بسيط، ومواقع التصوير تتنسق من غير دوشة.
اللجنة كمان مش دورها إنها توافق على التصوير بس، لأ، دي مسؤولة عن الترويج لمصر عالميا كوجهة مناسبة للإنتاج السينمائي. ده غير إنها هترشح شركات مصرية وكوادر فنية للمشروعات الأجنبية عشان تستفيد الصناعة المحلية من ورا وجود أي فيلم أو مسلسل بيتصور هنا.
طب هل مصر ممكن فعلًا تجيب عملة صعبة من تصوير الأفلام الأجنبية؟
الإجابة باختصار، أيوه وبشكل كبير.. الدول اللي سبقتنا في الموضوع ده زي المغرب والأردن وإيطاليا بيكسبوا مليارات سنويا من تصوير أفلام ومسلسلات عالمية عندهم.
وده بيخلق وظائف، حركة سياحة، إنفاق ضخم من الشركات الأجنبية، وبيحرك اقتصاد كامل حواليه. وإذا مصر قدمت خدمات كويسة، وتصاريح سريعة، وأسعار منافسة، ومعالم طبيعية وأثرية موجودة من الأساس، يبقى عندها فرصة قوية تدخل السوق ده بثقل.
المدينة الجديدة عند الأهرامات هتكون أقرب لمفهوم المدن العالمية اللي بتعمل إنتاج ضخم. تخيل إن أي فيلم أجنبي يحب يصور لقطة عند الهرم، أو في ديكور فرعوني، أو في موقع حديث، يلاقي كل اللي محتاجه في مكان واحد من غير ما يضيع وقت أو فلوس. ده اللي بيزوّد جاذبية مصر كموقع تصوير.
فإحنا قدام مشروع لو اتنفذ صح ممكن يقلب شكل الصناعة في مصر بالكامل، ويرجعها في مكان المنافسة العالمية. وممكن يبقى مصدر دخل كبير للدولة، ويخلق فرص شغل كتير، ويحوّل منطقة الأهرامات من مجرد موقع أثري لمركز صناعة عالمية كاملة.
