الذهب عامل قلق.. تقرير أمريكي يفجر مفاجأة كبرى
ليه الدهب وقع فجأة؟ وليه النزول كان سريع بالشكل ده؟ وهل التراجع ده مجرد حركة مؤقتة ولا بداية موجة هبوط جديدة ممكن تغيّر اتجاه السوق كله؟ وأهم سؤال عند أي حد نشتري دلوقتي ولا نستنى شوية يمكن الأسعار تنزل؟
نبدأ من آخر تطورات السوق.. الدهب خلال الساعات اللي فاتت فقد جزء ملحوظ من مكاسبه ونزل حوالي 0.4% في التداولات الفورية وسجّل قريب من 4050 دولار للأونصة، وكمان العقود الآجلة نزلت بـ 0.5% تقريبا.
وطبعاً السؤال اللي كل الناس بقت تسأله… إيه اللي قلب السوق بالشكل ده فجأة؟
اللي حصل ببساطة إن الدولار بدأ يقوى، ومعاه بدأت توقعات خفض الفايدة من الفيدرالي الأمريكي تتفك وحدة وحدة وخليك فاكر إن الدهب والدولار دايماً في شد وجذب… لما الدولار يعلَى، الدهب غالباً بيروح للناحية التانية. وده اللي بنشوفه دلوقتي دلوقتي فعلاً بعد ما مؤشر الدولار طلع لأعلى مستوى في أكتر من أسبوعين، وده خلّى شراء الدهب أصعب على الناس اللي بتتعامل بعملات تانية، فالحركة كلها راحت ناحية البيع.
لكن القصة الأكبر ورا الهبوط مش الدولار بس… لأ، الموضوع مرتبط بتوقعات الفايدة اللي اتغيرت تماماً الأيام اللي فاتت.. لحد امبارح بس.. السوق كان شايف إن في فرصة تقريباً 49% إن الفيدرالي يخفض الفايدة في اجتماع ديسمبر.. النهاردة النسبة نزلت لـ 33% بس. وده معناه إن الأسواق بقت شايفة إن خفض الفايدة مش قريب زي ما الناس كانت فاكرة.
وهنا مربط الفرس… الدهب دايماً بيعلَى لما الفايدة تبقى منخفضة، ليه؟ لأنه أصل "ما بيدرّش عائد" فلو الفايدة منخفضة، المستثمرين بيجروا عليه إنما لو في توقعات إن الفايدة هتفضل عالية شوية… الدهب بيتراجع وده اللي بيحصل حاليا.
اللي زوّد القلق كمان هو إن السوق مستنية "تقرير الوظائف الأميركية غير الزراعية" اللي المفروض كان ينزل، واتأجل بسبب الإغلاق الحكومي. التقرير ده مهم جداً لأنه هيورّي الفيدرالي إذا كان الاقتصاد لسه قوي، ولا بدأ يهدى… ولو طلع قوي، ده معناه إن الفيدرالي ممكن يكمل تشديد ومش هيخفض فايدة. وبالتالي ده ممكن يضغط على الدهب أكتر.
وطبعاً المحللين شايفين إن الدهب عنده مقاومة واضحة عند مستوى 4155 دولار… وطالما الفيدرالي لسه مش واضح فمن المتوقع إنه يفضل متداول ما بين 4000 و3980 دولار. ودي مستويات لو كسرها ممكن يخلي السوق كلها تعيد حساباتها.
طيب نرجع للسؤال اللي محير كل الناس… هل الدهب ممكن ينزل أكتر الفترة الجاية؟
الإجابة… الموضوع كله هيعتمد على حاجتين.. قوة الدولار، ومسار الفايدة الأميركية لو توقعات خفض الفايدة فضلت تتراجع، ولو بيانات الوظائف طلعت قوية، الدولار هيكمل صعود… وساعتها الدهب غالباً هيدخل في موجة تراجع أكبر.. لكن لو البيانات جت ضعيفة أو حصل أي توتر اقتصادي يخوف السوق… الدهب ممكن يرجع تاني ويقفّز فوق 4100 بسهولة.
السوق دلوقتي في حالة ترقّب.. كل حاجة معلّقة على قرار الفيدرالي والبيانات الأميركية اللي جاية.. وفي الوقت ده أسعار الدهب ممكن تشهد تذبذب كبير صعود ونزول لحد ما الصورة تبقى أوضح.
