إنجاز جديد لطلعت مصطفى.. 6200 فرصة عمل جديدة بمشروع الضبعة.. وشركة صينية كبرى تستثمر في المفروشات القطنية
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، إنجاز جديد لطلعت مصطفى، و6200 فرصة عمل جديدة بمشروع الضبعة، وشركة صينية كبرى تستثمر في المفروشات القطنية.
نبدأ من مجموعة طلعت مصطفى القابضة اللي أعلنت إنها سجلت قيمة سوقية وصلت لحوالي 148 مليار جنيه مصري يعني تقريبا 3.1 مليار دولار أمريكي لحد يوم 10 نوفمبر 2025 وبكده بقت من أكبر 6 في المية من الشركات المدرجة في أسواق إفريقيا والشرق الأوسط وأمريكا اللاتينية وكمان بقت تاني أكبر شركة ضمن مؤشر إيجي إكس 30.
المجموعة أوضحت في تقرير الإدارة التنفيذية إن المكانة دي بترجع لتنوع أصولها العقارية والفندقية والقيمة الكبيرة اللي موجودة في محفظتها الاستثمارية اللي فيها 11 فندق شغال و4 فنادق جديدة تحت الإنشاء غير الأصول العقارية والأراضي اللي عندها في القاهرة والإسكندرية وشرم الشيخ والأقصر وأسوان ومرسى علم ده غير مشروعات تانية لسه في مرحلة التخطيط
التقرير كمان أشار إن الإيرادات اللي حققتها المجموعة خلال سنة 2024 خلتها في صدارة شركات التطوير العقاري في مصر وكمان ضمن أعلى 8 في المية من الشركات المدرجة في الأسواق الناشئة بعد ما سجلت نمو تراكمي في الإيرادات بنسبة 31.9 في المية خلال آخر خمس سنين وكمان طلعت ضمن أعلى 3 في المية من الشركات الناشئة على مستوى العالم من ناحية معدل نمو الإيرادات في نفس الفترة وده بيعكس قوة نموذج أعمالها وتنوع مصادر دخلها.
ونروح بعد كده لوزارة العمل اللي أعلنت بالتعاون مع شركة بتروجت للمشروعات البترولية والاستشارات الفنية عن توفير حوالي 6200 فرصة عمل جديدة ضمن مشروع الضبعة النووي وده ضمن جهود الوزارة المستمرة لتوفير فرص عمل كويسة للشباب في المشروعات القومية الكبيرة.
الوظايف المطلوبة كانت كالتالي 500 مساعد مسلح 3000 مساعد حداد 1000 فورمجي 500 نجار مسلح 1000 مساعد نجار 100 لحام أرجون و100 لحام كهرباء.
الوزارة أوضحت إن المرتبات الأساسية بتبدأ من 10 آلاف جنيه شهريا وبتوصل لحد 45 ألف حسب نوع الوظيفة ومستوى الخبرة وكمان في سكن مجاني ومواصلات وتأمينات اجتماعية وصحية شاملة ونظام العمل هيكون 24 يوم شغل و6 أيام راحة والاختبارات هتتعمل في مجمع خدمات وزارة العمل في مدينة الضبعة والوزارة أكدت إن التقديم متاح عن طريق مسؤولي التشغيل بالأرقام اللي في الإعلان الرسمي وقالت إن الفرص دي بتيجي ضمن خطة التوسع في المشروعات القومية وتوفير شغل محترم للشباب في التخصصات الفنية المختلفة.
ونروح للهيئة العامة للتحكيم واختبارات القطن اللي استقبلت وفد من شركة MINE وهي واحدة من أكبر الشركات الصينية في مجال صناعة المفروشات القطنية عشان يبحثوا إنشاء خطوط إنتاج جديدة في مصر.
الزيارة دي بتيجي ضمن جهود الوزارة لجذب استثمارات أجنبية جديدة للسوق المصري وبتتماشى مع توجه الدولة لبناء شراكات استراتيجية وتقوية التعاون الدولي وبتوضح كمان اهتمام الشركات العالمية بالاستثمار في مصر خصوصا الشركة الصينية دي اللي تعتبر من أكبر مستوردي القطن المصري وبتفكر تفتح خطوط إنتاج جديدة لمفروشات معمولة بالكامل من القطن المصري والوفد حرص إنه يعرف تفاصيل منظومة القطن في مصر من أول الزراعة لحد الحليج عشان يضمن جودة المنتج النهائي.
ونختم بخبر مهم من مجموعة ستاندرد بنك أكبر مؤسسة مالية في إفريقيا من حيث الأصول واللي أعلنت عن الافتتاح الرسمي لمكتبها التمثيلي في مصر في فعالية كبيرة عند أهرامات الجيزة.
افتتاح المكتب خطوة استراتيجية هدفها تقوية حركة التجارة والاستثمار بين مصر ودول إفريقيا جنوب الصحراء وكمان منطقة الشرق الأوسط وده بيأكد على الدور المهم اللي بتلعبه مصر كبوابة رئيسية في ممر التجارة الإفريقي الممتد من الشمال للجنوب.
ومن خلال مكتب ستاندرد بنك في مصر المجموعة بتستهدف تعمق التزامها بدعم نمو القارة الإفريقية عن طريق مساعدة الشركات المصرية اللي عايزة تتوسع جوه القارة وكمان تمكين الشركات العالمية إنها تستثمر في الاقتصاد المصري الحيوي.
