صفقة بـ 30 مليار دولار .. قطر هتعمل عظمة في “علم الروم”
يا ترى ايه اللي بيحصل فى الساحل الشمالي ؟وايه حكاية الاستثمار الضخم اللى قطر هتضخه هناك؟ هل مشروع واحد بس ممكن يغيّر شكل الساحل الشمالي بالكامل؟ وليه قطر اختارت "علم الروم" بالذات؟ وهل الصفقة دي بداية شراكة اقتصادية جديدة بين مصر وقطر… ولا مجرد صفقة عابرة زي أي مشروع تاني؟
اللي أعلنته وكالة "رويترز" مؤخرًا بيأكد إن شركة الديار القطرية وقعت اتفاق ضخم جدًا مع هيئة المجتمعات العمرانية الجديدة في مصر، لتطوير منطقة علم الروم بمحافظة مطروح، بقيمة إجمالية وصلت 29.7 مليار دولار.
الأرقام دي مش مجرد استثمار عادي.. دي رسالة واضحة إن الساحل الشمالي دخل مرحلة جديدة تمامًا، بتحوّله من منطقة سياحية موسمية لمركز عالمي للتنمية العقارية والسياحية.
الاتفاق بين القاهرة والدوحة بييجي بعد زيارة مهمة لرئيس الوزراء الدكتور مصطفى مدبولي لقطر، واللي شارك خلالها في القمة العالمية للتنمية الاجتماعية، والتقى برجال الأعمال القطريين هناك، وأكد إن مصر فاتحة بابها للاستثمارات العربية والخليجية، وبتقدّم تسهيلات ضخمة لأي مستثمر عايز يضخ أموال حقيقية في السوق المصري. وبالفعل، الصفقة دي كانت أول ترجمة عملية للرسائل دي.
وبحسب المعلومات اللي خرجت، الديار القطرية هتسدد حوالي 3.5 مليار دولار تمن الأرض، وده غير 26.2 مليار دولار استثمار عيني هيتم ضخه في المشروع نفسه.. يعني ببساطة، المشروع ده مش بس بيع أرض.. دي عملية تطوير شاملة هتحوّل "علم الروم" لمدينة عالمية متكاملة، فيها كل عناصر الحياة الفاخرة.
المشروع هيغطي مساحة ضخمة بتوصل لـ 4900 فدان، على امتداد 7.2 كيلومتر من الساحل، وده بيشمل وحدات سكنية فاخرة، ملاعب جولف، مراسٍ بحرية، مدارس، جامعات، ومناطق ترفيهية وسياحية.
واللي يلفت النظر إن المشروع متوقع يحقق إيرادات سنوية لا تقل عن 1.8 مليار دولار، وهي أرقام ضخمة هتساهم في دعم الاقتصاد المصري، خصوصًا مع تخصيص 15% من أرباح المشروع لصالح هيئة المجتمعات العمرانية الجديدة.
الموقع نفسه كمان مش عادي… "علم الروم" تبعد حوالي 50 كيلومتر عن رأس الحكمة، اللي كانت محور صفقة إماراتية بـ35 مليار دولار في 2024.
يعني إحنا بنتكلم عن منطقة بتتحوّل بسرعة لـ"الريفيرا الجديدة" على البحر المتوسط — مركز استثمارات عربية ودولية بيجمع بين الجمال الطبيعي والمشروعات العملاقة.
وكمان موقع علم الروم مميز جدًا لقربه من مطار مطروح الدولي ومحطة القطار وجامعة مطروح، وده بيدّي المشروع ميزة لوجستية كبيرة بتسهّل الوصول ليه من أي حتة.
الأكيد إن الصفقة دي مش صدفة ولا مجرد اتفاق تجاري.. لكنها جزء من خطة أكبر بتقودها الحكومة المصرية لجذب الاستثمارات الخارجية وتعزيز الشراكات مع الدول العربية، خاصة بعد التحسن اللي شهده الاقتصاد المصري مؤخرًا في استقرار العملة وتسهيل تحويل الأرباح للمستثمرين الأجانب.
مدبولي بنفسه أكد خلال لقاؤه برجال الأعمال القطريين إن الحكومة حريصة إن تجربة المستثمر القطري في مصر تكون ناجحة، وإن الفترة الجاية هتشهد الإعلان عن صفقات تانية بنفس الحجم أو أكبر.
بكده، مشروع علم الروم مش مجرد تطوير عمراني.. دي إشارة لمرحلة جديدة من العلاقات المصرية القطرية، مبنية على المصالح الاقتصادية المتبادلة، واستراتيجية بتفتح الباب لمشروعات ضخمة تانية على ساحل المتوسط.
وده كمان بيثبت إن المنافسة الاستثمارية في شمال مصر بقت حقيقة بعد صفقة رأس الحكمة الإماراتية، دلوقتي قطر بتدخل السباق بقوة.
اللي جاي ممكن يغيّر شكل الساحل الشمالي كله.. من مجرد وجهة صيفية، لمنطقة بتنافس أكبر المدن الساحلية في العالم.
